Қолтаңба
Бір күні айтыскер ақын Сырым Әуезхан, атақты «Сары тентек» атанған Қуаныш Мақсұтовтан қолтаңба алуға барған екен. Қуекең де қу екен. Жас балаға өлең жазып беріп тұрғанша, «қаламсабымды беріп құтылайын» деп ойлапты. Сөйтсе біздің Сырым Қуекеңнің ручкасын алып тұрып: «автографты өзім жазып алайын ба, аға», – деген екен.Холодильник
Бір күні айтыскер ақын Нұрлан Мұсаев таксиге отырып, көліктің есігін қатты серпіп жауып жіберсе керек. Өз машинасына жаны ашып кеткен шопыр «бауырым, есікті ақырын жапсаңшы, үйіңде холодильник жоқ па?» деп ренжіген көрінеді. Сөйтсе, сөз тапқыш Нұрлан «Холодильник бар ғой, бірақ оны ішінен жауып көрмеппін» деген екен.Бір әріп
Нұрлан Аққазин деген айтыскер ақынды бір айтыста жүргізуші Нұрлан Аққозин деп сахнаға шақырыпты. Фамилиясы қате айтылғанға ренжіп, Нұрекең сахнаға шықпай қойса керек. Қазылар алқасында отырған үлкендер «бір әріпте тұрған не бар сонша, халықты күттіріп қойғаның ұят емес пе?!» – деп ұрысып жатса, Нұрлан: «Бір әріпке көп нәрсе байланысты. Сендерді әділ қазылар демей, әділ қозылар десе жақсы ма?» деген екен. Жазып алған Рауан ҚАЙДАР, «Егемен Қазақстан»
