Қалаулылар халықпен кездесулер өткізді

Облыста жұмыс сапарымен жүрген Парламенті Мәжілісінің депутаттары Владимир Божко, Бақтықожа Ізмұхамбетов, Құралай Қарекен, Глеб Щегельский, Абай Тасболатов Қ.Жұбанов атындағы Ақтөбе өңірлік мемлекеттік университетінде «Еркін пікір» алаңында жастар ұйымдары өкілдерімен кездесті. Облыс әкімінің орынбасары Асқар Шериязданов депутаттарды жеке-жеке таныстыра келіп, олардың облыстың бірқатар өнеркәсіп кәсіпорындары мен ауыл шаруашылығы құрылымдарында, бірқатар аудандарда болып, жұмысшы­лар­мен және тұрғындармен кездескенін жеткізді. Жастармен жүздесуде сөз алған Парла­мент Мәжілісі Төрағасының орын­басары Владимир Божко депутаттар­дың облыс орталығында және аудандар­да көп­те­ген кездесулер өткізіп, Елба­сы жүргізіп отырған саясатты, «100 нақты қадам» Ұлт жоспарында айқындалған тапсырмалардың орындалу барысын түсіндіргенін тілге тиек етті. Кәсіпорындарда, еңбек ұжымдарында және оқу орындарында болған кездесу­лерге қатысушылардың кейбір ұтымды ұсыныстары Парламенттегі жұмыста басшылыққа алынатынын айтты. Мәжіліс депутаттары жастардың аза­мат­тарды уақытша тіркеу, жоғары оқу орын­дарында қазақ тіліндегі техникалық оқулық­тардың жетіспеушілігі, аз қамтыл­ған отбасыларынан шыққан және бел­сенді жастарға қаржы гранттарын бөлу секілді мәселелерге қатысты және басқа сауал­дарына толыққанды жауап берді. Сатыбалды СӘУІРБАЙ, «Егемен Қазақстан» Ақтөбе облысы *** Парламент Сенатының депутаттары Қайрат Ищанов пен Сәрсенбай Еңсегенов Атырау облысында өңір басшысы Нұрлан Ноғаевпен кездесіп, онда аймақтың әлеуметтік-экономикалық даму келешегі талқыланды. Қ.Ищанов бекіре тұқымдас балық өсі­ре­тін зауытта және тоқыма өнімдерін шы­ғаратын «Каспий Лана Атырау» кәсіп­орнында болып, еңбек ұжымдарымен кездесті. Ал С.Еңсегенов Исатай және Жылыой аудандарында жергілікті мәслихат депутаттарымен, әкімдік қызметкерлерімен, құқық қорғау және бұқаралық ақпарат құралдарының өкілдерімен, шаруа қожалықтарының жетекшілерімен және жергілікті тұрғындармен кездесті. Сенаторлардың жұртшылықпен жүз­десу­­л­ерін­де Сенат қабылдаған заңдар мен «Өңiр» депу­таттық тобының қызметі туралы ай­тыл­ды. Сондай-ақ, Елбасының «100 нақты қадам» Ұлт жоспарын іске асыру, рес­пуб­ли­ка­л­ық бюджеттің атқа­рылуы мен Кәсіп­кер­лік кодексіне қатыс­ты мәселелер де қамтыл­ды. Азамат­тарды қабылдауға 5 адам келді. Сенаторлар кейінгі күндерде Индер, Мақат, Махамбет және Құрманғазы аудандарына да барып, еңбек ұжым­дары­мен кездесулер өткізді.  Жолдасбек ШӨПЕҒҰЛ, «Егемен Қазақстан» Атырау облысы *** Сенатор Сергей Ершов Қарағанды облысындағы Қарқаралы ауданында жұмыс бабындағы сапармен болды. Қаршығалы ауылдық округінде депутат жергілікті шаруа қожалықтарының жетекшілері және ауыл шаруашылығы өнімдерін өндірушілерімен кездесті. Жүздесу барысында Парламент Сена­тында қаралып жатқан «Жайылым­дар туралы» және «Қазақстан Респуб­ликасының кейбір заңнамалық актілеріне жайылымдарды пайдалану мәселелері бойынша өзгерістер мен толықтырулар енгізу туралы» заң жобаларының ережелері талқыланды. Жергілікті тұрғындар жеке үй-жайды ұстау мақсатындағы жайылым жерлерді, сондай-ақ жайылымдарды тиімді пайдаланудың өзекті мәселелерін заңнамалық тұрғыда реттеуге баса назар аударып отыр. Шаруа қожалықтарының жетекшілері мен ауыл шаруашылығы өнімдерін өнді­ру­шілер аграрлық және ветеринария сала­ларын реттеуге байланысты бірқатар мәсе­лелерді көтерді. Аудандық мәслихат депутаттарымен кездесу барысында С.Ершов «100 нақты қадам» Ұлт жоспарын заңнамалық тұрғы­да іске асыру жөніндегі Парламент­тің заң шығару жұмыстары туралы айтып берді. Қайрат Әбілдинов, «Егемен Қазақстан» Қарағанды облысы *** Сенат депутаттары Рашит Әкімов пен Жабал Ерғалиев өңірлерге сапары барысында Ақмола облысының Ерейментау ауданында болып, жергілікті мәслихат депутаттарымен, аудандық қоғамдық келісім мүшелерімен және аудан активімен кездесті. Білім беру саласы мен өндіріс нысан­дарын, Бөгенбай батыр атын­дағы­ тарихи-өлкетану музейін аралап, мұғалім­дермен, мәдениет қызметкер­лерімен, жұмысшылармен пікір алмасты. Аудандық әкімдіктің мәжіліс залында өткен кездесуді Ерейментау ауданының әкімі Ермек Нұғыманов ашып, өңірдің әлеуметтік-экономикалық дамуы жа­й­ын­да хабарлама жасады. Аудан активі алдында сенаторлар сөз сөйлеп, қойылған сұрақтарға жауап берді. Пікір алмасу барысында Ерейментау аудандық мәс­лихатының депутаты, «Хамзе» шаруа қожалығының басшысы Ержан Биекенов «Астана – Павлодар» бағытындағы жолға қатысты ойларын ортаға салды. Ерейментау қаласындағы «№811 автомобиль жөндеу зауыты» акционерлік қоғамының кәсіпорнында, өткен жылғы жаңа оқу жылында пайдалануға берілген Ерейментау қаласындағы №4 орта мектепте және Бөгенбай батыр атындағы тарихи-өлкетану музейінде болған Рашит Әкімов пен Жабал Ерғалиев жұмыс­шылармен, инженер-техник мамандармен, мұғалімдермен және мәдениет қызметкерлерімен ой бөлісті. Қазір негізінен Қорғаныс  министр­лігінің өтінім­дерін орындап, әскери техни­каларды жөндеп, қалпына келтіру­мен айналысатын автомобиль жөндеу зауы­тының бас директоры Ержан Кәрімов өздерінде кез келген тапсырысты орын­дауға толық мүмкіндіктер бар екенін айтты. Қазір зауыт 200-ге жуық адамды жұмыс орнымен қамтамасыз етіп отыр. Бақберген АМАЛБЕК, «Егемен Қазақстан» Ақмола облысы *** Парламент Сенатының депутаты Қуаныш Айтаханов жұмыс бабындағы сапармен Оңтүстік Қазақстан облысындағы бірқатар аудандарда болды. Депутат сапары барысында Бәйдібек, Отырар, Түлкібас және Түркістан аудандарында жергілікті атқарушы биліктің басшылығымен, мәслихат депутаттарымен, жұртшылықпен, орта және шағын бизнестің, үкіметтік емес ұйымдардың өкілдерімен, аудан жастарымен кездесті. Қ.Айтаханов аймақтағы жергілікті тұр­ғын­дармен болған жүздесулерде Ел­басы­ның «100 нақты қадам» Ұлт жос­пары­­ның ая­сын­дағы бес институттық рефор­маны іске асыру барысы туралы хабар­дар етті. Сена­тор сондай-ақ Мемлекет басшы­сы­­ның Қазақ­стан Тәуелсіздігінің 25 жыл­ды­ғы­на арналған салтанатты жиналыста сөйле­ген сөзінде айтылған міндеттерге жан-жақты тоқтала келіп, заң шығару жұ­мыс­тары­ның жоспары және оны іске асыру­дағы парламентшілердің қызметі туралы әңгімеледі. Бақтияр ТАЙЖАН, «Егемен Қазақстан» Оңтүстік Қазақстан облысы *** Сенат депутаты Манап Көбенов Павлодар облысында жұмыс бабындағы сапарын одан әрі жалғастырды. Сенатор Железин ауданында «Пахарь» шаруа қожалығында болды. Кәсіпорын өкілдері өндірісті одан әрі дамыту жоспарлары туралы айта келіп, инфрақұрылым жағдайымен таныстырды және тұрғын үй кешені мен демалыс орталығын көрсетті. Железинка ауылында М.Көбенов аудандық орталық ауруханасының еңбек ұжымымен кездесті. Депутат перзентханада, хирургия бөлімінде және емханада болды, шала туған сәбилерге арналған жабдықтармен танысты. Железин жалпы білім беретін №1 орта мектептің мұғалімдерімен кездесуде он екі жылдық білім беруге, шағын жабдықталған мектептердің жабылуы мен арнайы пәндерді ағылшын тілінде оқытуға байланысты мәселелер талқыланды. М.Көбеновтің Железин ауданындағы ардагерлердің бастауыш ұйымдары­ның өкілдерімен кездесуінде зейнетақы­ның өсуі мен шағын ауылдардағы су құбырының құрылысына байланысты әлеуметтік мәселелер көтерілді. Фарида БЫҚАЙ, «Егемен Қазақстан» Павлодар облысы *** Парламент Мәжілісі депутаты Серік Үмбетов Алматы облысына сапары аясында Іле және Қарасай аудандарын аралады. Алдымен Іле ауданындағы «Данон Беркут» сүт зауытының жұмысымен танысты. «Даму» индустриялық-логисти­ка­лық орталығында орналасқан сүт зауыты­ның жұмысы жайлы «Данон» компания­сының Орталық Азия және Кавказ елдері бойынша Бас директоры Рено Шамональ баяндады. Оның айтуынша, қазіргі кезде кәсіпорынның өнімдері Қазақ­стан, Қырғызстан, Өзбекстан, Түрікменстан, Тәжікстан, Әзербайжан, Грузия, Армения, Моңғолия сынды тоғыз елге шығарылады және аталған мемлекеттерде тұратын 80 мил­лионнан астам тұтынушының сұранысы мен талабына сай болып отыр. Сондай-ақ, Серік Үмбетов «Даму» индус­т­риял­ық-логистикалық орталы­ғының бас кеңсе­сіне де бас сұғып, «Amanat Invest Group» ЖШС президенті әрі құрылтайшысы Сәкен Тойлыбаевпен орта­лық жұмысының бүгіні мен бола­шағы жайлы әңгімелесті. Сапар аясында «Междуреченск Агро» мал шаруашылығы фермасын аралады. Мұнан кейін депутат Қарасай ауданы­на ат басын бұрып, «Шыны зауыты» ЖШС еңбек ұжы­мы­мен жүздесті. Қытай мен Қазақстанның өзара әріп­тестігі нәтиже­сінде бой көтерген зауыт кешенінде өндіріс­тік ғимараттармен бір­ге, жұ­мыс­­шы­ларға арналып әлеуметтік-тұр­мыс­­тық нысандар салынғанына назар аударды. Нұрбол ӘЛДІБАЕВ, «Егемен Қазақстан» Алматы облысы *** Сырым ауданына жұмыс сапарымен Парламент Сенатының депутаты Ерболат Мұқаев келді. Аудан орталығында әлеуметтік нысандардың жұмысымен танысқан сенатор «Нұр Отан» партиясы Сырым аудандық филиалының мәжіліс залында жергілікті кәсіпкерлермен жүздесті. Кездесуді жүргізген Сырым ауданы­ның әкімі Абат Шыныбеков өзінің сөзінде аудандағы кәсіпкерлік саласының бүгінгі бағыт­тары жайлы баяндады. Ал Сырым ауда­ны­­ның кәсіпкерлері депутаттың алды­на өздері үшін өзекті болып отыр­ған мәсе­ле­­лерді қойды. Оның біреуі – ауыл­шаруа­шы­лық саласындағы жайылымдық жер­лер­ді пайдалану мәселесі. Қазіргі күні жайы­лым тарылды. Тарылудың бір себебі, мал басының өскенінде. Осыған байланысты алдағы тұрған бір жұмыс – елді мекендердің иелігіндегі жерді кеңейту. Кеңейту кейбір шаруашылықтардың пайдасындағы жерлер арқылы да жүзеге асырылуы мүмкін. Ауыл шаруашылығымен айналысатын аудан шаруалары мемлекеттік бағдарла­ма­лар арқылы несие алғаны үшін төлене­тін мемлекеттік субсидия неліктен тоқтап тұр деген сауал қойылды. Бұл сауал да сена­тор­дың қойын дәптерінің ішіне түр­тіліп кетті. Нақты жауап кейін берілетін болады. Қазіргі күні ауыл шаруашылы­ғын қаржыландыруға арналған мемлекет­тік бағдарламаларды жүзеге асыру орталық­тарын­да өңкей қаржыгерлер, заңгерлер жинал­ған. Ал нақты шаруашылықтың жайын біліп, зерделейтін агроном да, зоотехник те жоқ. Кездесуде осы мәселе де сөз болды. Кездесуді аудан әкімі қорытындылады. Темір ҚҰСАЙЫН, «Егемен Қазақстан» Батыс Қазақстан облысы *** Парламент Мәжілісінің депутаттары Мұхтар Ерман мен Фахредин Қаратаев Жамбыл ауданы, Бектөбе ауылындағы «БиномСтройДеталь» ЖШС-нің тыныс-тіршілігімен танысты. Жұмысын 2010 жылы бастаған серіктес­тік алғашында су шаруашылығына арнал­ған лотоктар өндіріп, үйге қажетті жаб­дықтар шығарумен айналысыпты. Бүгін­де зауыт 125 адамды жұмыспен қамтып отыр. Жұмысшылардың орта­ша жалақысы 80-90 мың теңге. Өткен жылы кәсіпорын 80 пәтерлік бір үй, 60 пәтерлік екі үйдің құрылысын толық аяқтап, қолдануға берген. Неміс техно­логия­сымен жұмыс жасайтын кәсіпорын ағымдағы жылы аудандарда өздерінің филиалдарын ашып, 3-5 қабатты үйлер салуды жоспарлауда. – Атқарылып жатқан жұмыстар­дың қар­қыны жақсы. Десе де алдағы уақыт­та қанаты­мызды кеңге жайып, қо­сым­ша филиалдар ашып, жұмыс ор­нын көбейтсек деген жоспарымыз бар. Бүгінде «Бәйтерек» холдингімен кел­і­сім-шартқа тұрдық. Үйлер­ді жалға беру, сату сынды жұмыстармен аталған се­ріктес­тік айналысады. Өткен жылы айы­на 2 мың шаршы метр үй салсақ, биыл бұл көрсеткішті 3 мыңға жеткізуді ойластырудамыз. Зауыт шығарған тауардан былтыр 560 млн теңге қаржы түсті, – дейді «БиномСтройДеталь» ЖШС директоры Кеңесхан Аралбеков. Парламент Мәжілісінің депутаттары кез­десу барысында мемлекеттік бағдар­ла­ма аясында жүзеге асырылуы тиіс бірқатар мәсе­лелерді ортаға салды. Сондай-ақ, екі күнге жоспарланған сапарлары бары­сында Мәжіліс депутаттары басқа  да аудан­дарда болып, халықпен кездесіп, ірі кәсіп­орындар мен білім нысандарының жұмысымен танысты.  Оралхан ДӘУІТ, «Егемен Қазақстан» Жамбыл облысы *** Мәжіліс депутаты Амангелді Айдарұлы «Алматы стекло» шыны зауытына барып, өндіріс орнының жұмысымен танысты. Тәуелсіздіктің 25 жылдығы қарсаңында ашылған бұл зауыт Қазақстан және Қытай инвесторларының 100 миллиард теңге қаржысына салынған. Қазіргі таңда мұнда оншақты түрлі, алуан көлемдегі шыны ыдыс­тар және оларға арналған арнайы қақ­пақтар шығарылады. Қытайда өндірілген құрылғылармен жұмыс істеу үрдісін жер­гілікті жұмыскерлерге Аспанасты елінен келген шеберлер үйретуде. Болашақта зауыт толық іске қосылғанда мұнда 500-ге жуық адам жұмыспен қамтылмақ. Әзірдің өзінде төрт ауысыммен жұмыс істейтін өндіріс орнында 300-ден аса адам еңбек етуде. Мәжіліс депутаты ең алдымен, зауыттың жас мамандары мен жұмысшыларының өнді­ріс орнындағы қауіпсіздігі және әлеу­мет­тік жағдайымен танысты. Оларды маза­ла­ған сауалдарға жауап беріп, қазіргі таңда елі­мізде жас отбасылардың баспана мәсе­ле­сін шешуге септігі тиетін «Нұрлы жер» бағ­дар­ламасының ерекшеліктерін түсіндірді. Бұдан кейін Амангелді Айдарұлы Алматы облысының Көксу, Іле, Алакөл,  Ілияс Жансүгіров атындағы  аудандарына барып, «Нұрлы жол» және «Нұрлы жер» мемлекеттік бағдарламаларының орындалу барысымен танысты. Сапар барысында сайлаушылар айтқан ұсыныстар мен өтініш­терді болашақта Үкімет отырыс­тарын­да мәселе етіп қоятынына сендірді.  Талғат СҮЙІНБАЙ, «Егемен Қазақстан» АЛМАТЫ *** Қызылжар өңіріне жұмыс сапарымен келген Парламент Мәжілісінің бір топ депутаты елді мекендерді аралап, жұртшылықпен кездесті. Сондай мағыналы жүздесудің бірі Мамлют ауданында өтті. Онда депутаттар Петр Шарапаев, Сергей Звольский аудан тұрғындарымен ашық әңгімелесіп, қордалан­ған проблемаларды бірігіп шешудің жо­л­дарын ортаға салды. Жиында зейнеткер Екатерина Богуш жастар арасындағы жұмыссыздық мәселесін қозғады. Оның айтуынша, ауылдық жерлерде токарь, механик, комбайншы, тракторшы секілді мамандықтар жетіспейді. Сондықтан кәсіптік бағдарлау жайына ерекше назар аудару керек. Парламент Мәжілісінің депутаттары бұл бағыт бойынша Үкіметтің арнайы бағдарлама әзірлеп, нақты шаралар қабылдағанын жет­кізді. Үстіміздегі жылдан бастап кәсіптік білім беру мемлекет қаржысы есебінен атқарылады. Колледж-училищелер салу ойластырылған. Кездесуде шекаралас аймақтарда орналас­қан облыс жастарының Ресейге оқуға көптеп баратыны айтылып, оның басты себебіне Қазақстанда оқу ақысының тым қымбаттығы көлденең тартылды. Биыл он мамлюттік жас көрші елдің жоғары оқу орындарына түсіпті. Жағдай осылай жалғаса берсе, дипломды мамандар тапшылығы туындайды. Кездесуде әлеуметтік салаларға қатысты басқа да жайттар, елді мекендерде «Агробиз­нес-2020» бағдарламасын, кәсіпкерлікті, АӨК-ті дамытудың жолдары талқыланды. Өмір ЕСҚАЛИ, «Егемен Қазақстан» Солтүстік Қазақстан облысы