Сот сараптамасы орталығындағы кездесу

Елордада Мәжіліс депутаттары Сот-сараптама орталығында болып, аталған институт басшылығымен және сарапшылармен кездесу барысында саланың өзекті мәселелері сөз етілді. Және де Парламент қабылдаған жаңа заңнамалық актілердің ережелері түсіндіріліп, оның орындалу барысы талқыға түсті. Мәжілістің Заңнама және сот-құқықтық реформа комитетінің хатшысы  Светлана Бычкова қа­зіргі таңда Парламентте қара­лып жатқан «Қазақстан Рес­пуб­­ликасындағы сот-сарап­тама қызметі туралы» заң жобасының басымдықтарына кеңінен тоқталды. Елдегі сарапшылық функцияларды бір мемлекеттік органның ішінде орталықтандыру нормалары заңдық құжаттың негізгі жаңашылдығы екендігі де ерекше аталды. Заң жобасымен елімізде жекеменшік сот сарапшылары институтын дамы­туға және сот сарапшылары палатасын құруға ерекше ден қойылған. Бұл ретте, жаңа заң жобасының ережелері бірқа­тар кодекс нормаларымен сәйкес­тендірілгендігін айта кету керек. Тағы бір белгілісі, заң жоба­сында сот-сараптама қызметі ай­тар­лықтай кеңейтіліп, жаңа ұғым­дармен толықтырылып отыр. Ал Әділет министрлігі Сот-сараптама орталығының директоры Исидор Борчашвили, өз кезегінде, еліміздің сот-сарап­тама мамандары шығар­ған ше­шімдері әлемнің 90-нан астам мемлекетінде мойын­да­латын­дығын жеткізді. «Халықаралық деңгейге шығу үшін аккредиттеуден өтуі­міз керек. Елімізде  мықты ма­мандардың барлығын дәлел­деуге тиіспіз. Астанадағы Сот-сараптама орталығы былтыр аккредиттеуден сәтті өтіп, биыл кеңеюде. Жалпы, Қазақстанның сот-сараптама мамандарының шығарған шешімдері  дәлел ретінде әлемнің 90-нан астам мемлекетінде мойындалады», деді И.Борчашвили. Биылғы жылдың бірінші тоқсанына дейін Орталық сот-сараптама институтының аккредиттеу ауқымы кеңейтіледі деп күтілуде, сондай-ақ, Ақмола, Алматы, Шығыс Қазақстан және Қарағанды облыстарында орналасқан зертxаналарға сапа стандарттарын енгізу жоспарланған.