Абель Санчес: Головкинге қарсы 12 раунд бойы ешкім шыдамайды

Бапкер Абель Санчес BoxingScene агенттігіне берген сұxбатында, оның қол астындағы боксшысы Геннадий Головкин америкалық Дэниэл Джейкобсті жойқын соққыларымен титықтатып, кейін нокаутқа жіберетінін мәлім етті. Ол Джейкобстың мықты тұстары барын мойындады, дегенмен Головкинмен  шаршы алаңда 12 раундқа ешбір боксшы шыдамайтынын тағы да еске салып өтті. "Дэниэлдің оң қолы өте мықты, оның соққысы өте жылдам, бірақ мен алдында айттым - Геннадийге қарсы ешкім 12 раунд бойы шыдап тұра алмайды. Бәрі-бір Джейкобсті ол сұлатпай тынбайды. Дэнни өз соққыларын дарытатыны анық, себебі бұл бокс, бұл ойынның ажырамас бөлігі. Алайда Геннадий түптің түбінде оны әбден титықтатып, дәл соққысын жасайды да нокаутқа жібереді", - дейді Абель Санчес. Өз кезегінде Дэниэл Джейкобстың бапкері Андре Розье 18 наурыз күні Геннадий Головкинмен кездесуде қандай тәсіл қолданатындарын айтып берді. Головкиннің өзі Джейкобсты өзінің мансабындағы ең мықты боксшысы деп санайды.