Жанбота АЛДАБЕРГЕНОВА: «Өз елімізде жауапкершілік жоғары болуы тиіс»

Қысқы Универсиадада шаңғы акробатикасынан ел на­мысын қорғайтын Қазақстанның фристайл құрамасының көш­бас­шысы Жанбота АЛДА­БЕР­ГЕНОВА бізбен кез­де­суінде осы жарысқа да­йын­дығы туралы әңгіме­леп берді. − Дайындығымыз қызу жүріп жатыр, Шымкентте жаттықтық. Енді Алматы арқылы Америкаға ұшып кетеміз. Онда Әлем кубо­гы­ның кезеңдеріне қатысамыз. Жарыстар аяқталған соң АҚШ-да бір аптадай жиын­дарда боламыз, кейін Универ­сиадаға қатысу үшін Қазақстанға ораламыз. − Жанбота, көңілің күпті болар? Қалай десек те, Қа­зақстанның фристайл ко­ман­дасының көшбасшысы деген жауапкершілік те бар. − Қатты толқып жүрмін, өйткені, өз елімде өнер көрсе­тетіндіктен, жауапкершілік те көбірек. Оған қоса, Қазақстанда осындай ауқымды ойындарға, қалың жұртшылық алдында тұңғыш рет ойын көрсетпекпін. 2011 жылғы қысқы Азия ойындарында менде ондай тәжірибе болған жоқ, өйткені, шаңғы акробатикасына Азиададан кейін келдім. − Маусым басталғалы бері ауа райы қатты құбылып тұр? Дайындық қалай? − Маусым басталғанда бізде белгілі бір қиындықтар туындады, Финляндиядағы оқу-жаттығу жиындарында толыққанды дайындықтан өте алмадық. Суоми жерінде жүргенімізде, ауа райы бір жылып, бір суып, бұрқасын көтерілді, сол себептен кейбір жаттығулар өткізілген жоқ. Сондықтан әлі өзімді сенімді сезініп жүрген жоқпын, алайда, Америкадағы Әлем кубогы кезеңдерінде мұны міндетті түрде еңсеремін. − Универсиадаға шаңғы спортының қандай саңлақ­та­ры келе жатқанынан хабардар шығарсың? − Қатысушылардың есім­дерін әлі білмеймін, дегенмен, басты қарсыластарымыз бұрынғысынша Қытай, Ресей және Беларусь атлеттері ғой. − Универсиада алдында жа­ңа элементтерді қосасыз ба? − Кейбір жаңа элементтерге жаттығып жүрмін, алайда, Универсиада кезінде оларды орындаймын ба, білмеймін. Құ­лап қалғаннан гөрі, күрделі емес секірістерді таза орындап шыққан дұрысырақ. Сондықтан тексерілген, әбден машықтанған секірістерге артықшылық беріледі, бірақ Америкадағы Әлем кубогынан кейін ғана оны нақты шешетін боламыз. − Фристайл – жүрекжұтқан өнерді талап ететін спорт тү­рі. Қазақстанда қысқы Уни­­версиаданың өтуі шаңғы акро­батикасына қызығатын жас­тардың көбеюіне әсер ете ала ма? − Бұл − өте қауіпті спорт түрі. 5-6 метр биіктікке секіріп, ауада айналу әркімнің қолынан келмейді. Батылдық, төзім керек. Универсиададан кейін біздің спорт түрі туралы адамдар көбірек біле бастайды деп үміттенемін. Өйткені, фрис­тайлмен шұғылданамын дегенде, көпшілік «бұл, не, би ме?» деп сұрайды. Сосын түсіндіруге тура келеді. Мемлекетіміз де спорттың осы түріне көңіл бөле бастады. Фристайл бойынша секцияларға келетін балалар саны артса, қытайлықтар секілді жоғары бәсеке болса деймін. Шаңғы акробатикасы фристайл спорт жарыстары ішіндегі ең экстремалдысы саналады. Сондықтан жанкүйерлердің барлығын оны өз көзімен көруге шақырамын. Әңгімелескен Айнаш ЕСАЛИ, «Егемен Қазақстан»  АЛМАТЫ