Астана Опера жаңа Гала-балет бағдарламасын дайындауда

«Астана Опера» балеттік труппасы жаңа Гала-балет бағдарламасын дайындауда, деп хабарлады театрдың баспасөз қызметі. Елордалық театрдың жарқыраған әртістер құрамы, сонымен қатар украиндық және беларусиялық театрлардан шақырылған солистер - Эллина Походных және Константин Героник 25 қаңтарда «Астана Опера» театрының Үлкен залында өнер көрсетеді. Балеттік труппаның көркемдік жетекшісі, Ресейдің халық әртісі Алтынай Асылмұратова көрерменді қызықты ойларымен қуантпақшы. Көрерменге М. Петипа мен А. Ваганованың ең үздік хореографиялық туындылары ұсынылады. Заманауи қойылымдардың әуесқойлары Р. Пети, С. Микель және К. Звереваның шығармашылығын тамашалайды. Естеріңізге сала кетсек, солистер арнайы жүлделердің иегерлері атанған - «Астана Опера» театрының сахнасында өтетін Гала концертте өнер көрсетуге құқық беретін сертификаттарға ие болған.