Балқашта ең дәмді нан пісіреді

«Балқаш нан» комбинаты ұжымы  түрлі байқауларда жеңістерге жетіп,  үнемі мерейі үстем болып келеді.  – Біздің кәсіпорын Тәуел­сіз­дігіміздің 25 жылдығында Елбасы қол қойған «Қазақстанның үздік тауары» номинациясы бойынша І дәрежелі дипломмен марапатталды, бұл өте айтулы оқиға деп білеміз. Сонымен бірге, бұл Балқаш нау­байханашыларының еңбегіне берілген жоғары баға әрі үлкен жауапкершілік, – дейді «Балқаш нан» комбинатыны директоры Айгүл Бүрленова. – Бүгінгі күні біздің кәсіпорын тек Балқашты ғана емес, қалаға іргелес жатқан кенттердің және Қарағанды, Алматы мен Астана қалаларының тапсырыс­­тарын орындайды. Болашақта кәсіп­орын­ның қуаты артпақ. Соған сәй­­­кес осы өнімдермен тәуелсіз еліміз­­­дің өзге де өңірлерін қамтамасыз ету көзделуде. Мақсатымыз – Балқаш наны маркасының танымалдығы артып, бүкіл Қазақстанға белгілі болса дейміз. Бүгінгі күні кәсіпорын 85-тен астам нан-тоқаш өнімдерін өндіреді. Жаңа технологияны пайдалана отырып, зауыт адам денсаулығына пайдалы диеталық және жоғары сортты нан өнімдерін шығарады. «Балқаш нан» комбинаты әлеу­меттік бағдардағы кәсіпорын ретінде аз қамтылған отбасы­ларына қолдау көрсетеді. Қала көлемінде өтетін қайырымды­лық акцияларына ұдайы қатысып, Балқаш қаласындағы балалар үйін нан өнімдерімен қам­тама­сыз етеді. Күн сайын мұқтаж жан­­дар­ға арналған дүкен арқылы нан өнімі тегін беріледі. Зауыттың іске қосылғанына көп болмаса да, Балқаш нан зауыты­ның жетістіктері аз емес. Өткен жылы зауыт ұжымы Ортаазия­лық халықаралық «WorldFood Kazakhstan 2016» көрме аясындағы  жылдың ең үздік нан және кондитерлік өнімдері байқауында «Жыл таңдауы» деген жоғары марапатқа ие болған еді. Сондай-ақ, екі үшінші орынды иеленіп, «Өнімнің ең жоғары сапасы үшін» медалімен марапатталған болатын. Қайрат ӘБІЛДИНОВ, «Егемен Қазақстан» Қарағанды облысы, Балқаш қаласы