Словакия спортшылары сақадай сай

Алматының алдында қысқы Универсиада ойындарын Словакия елі қабылдағаны белгілі. Ал Алматы­дағы жарыстарға келетін бұл елдің спорттық делегациясының құрамын­да 63 адам бар. Словакия да студенттік сайыс­тағы кіл мықтыларын анықтау үшін қысқы спорт түрлерінен талай жарыс өткізген. Әдетте Словакия спорт­шылары хоккей, мәнерлеп сырғанау, биатлон, сноуборд, тау-шаңғысы спорты және шаңғы жарыстарынан мықты болып келеді. Елдегі спорттық инф­ра­құрылымның жақсы дамуы да бұған үлкен ықпал жасап отыр. Сонымен Словакия спортшылары тау шаңғысы спорты мен хоккейден жүлде алудан дәмелі. Еске сала кетсек, Словакия 2015 жылғы 27-ші қысқы Универсиаданы өз жерінде қабылдаған болатын. Сол кезде FISU (Халықаралық студенттік спорт федерациясы) шешімі бойынша солтүстік бағдарлама және биатлон бойынша жарыстар Слова­кия­ның Штрбске-Плесо және Осрблье қалаларындағы қысқы спорт түр­леріне арналған орталықтарда өткізілді. Словакия спортшылары хоккей және тау шаңғысы спортында жүл­делі орындар үшін күресуді көздеп отыр. Осы елдің делегациясы фаворит­тер қатарында шаңғышы Матей Фала­таның есімін атайды. Матей Фалата 2015 жылғы қысқы Универ­сиаданың қола жүлдегері. Сондай-ақ, Қазақстан жанкүйер­леріне Словакия құрамасы­ның хоккейшісі Михаил Пихнарчиктің есімі де жақсы таныс. Қазіргі таңда ол Пав­лодардың «Ертіс» хоккей клубы­ның қорғаушысы ретінде өнер көрсетіп жүр. Алда келе жатқан Универсиадада ол Словакия құрамасының сапында ойнайтын болады. Айнаш ЕСАЛИ, «Егемен Қазақстан» АЛМАТЫ