Шығыс Қазақстан облысы, Үржар ауданы, Науалы балалар үйінің 14 тәрбиеленушісі Парламент Мәжілісі Үйінде болды. Олар 30 наурыз бен 1 сәуір аралығында Парламент Мәжілісінің депутаты, «Нұр Отан» ХДП Парламент Мәжілісіндегі фракциясының мүшесі Нұртай Сәбильяновтың арнайы шақыруымен Астана қаласымен танысуға келген еді.
Елорданы аралау барысында балалар Қазақстанның Тұңғыш Президентінің мұражайын, «Астана-Бәйтерек» кешенін, «Думан» ойын-сауық орталығын, Хан Шатыр, Тәуелсіздік, Бейбітшілік және келісім сарайларын барып көрді. Астананың басқа да көрікті жерлерін аралады.
Айта кету керек, еліміздің ең шығысындағы Науалы ауылында орналасқан «Науалы балалар үйі» мемлекеттік мекемесі 1934 жылы ашылған. Қазіргі таңда бұл балалар үйінде 90 бала тәрбиеленуде. Мемлекеттік бюджеттен қаржыландырылатын балалар үйі материалдық-техникалық жағынан толық жабдықталған, балалардың тұруына, білім алып, тәрбиеленуіне барлық жағдай жасалған. Балалар үйінің қарамағында 8 ғимарат, 2 отбасылық үлгідегі үй, клуб, жазғы лагерь және 4 автокөлік бар.
Елордаға келген балалар оқуды жақсы оқиды, тәрбиелері үлгілі. Мектеп жасына келген балалардың барлығы Науалы ауылының орта мектебінде білім алады. Балалар үйі түлектерінің 80 пайызы мемлекеттік грант бойынша жоғары оқу орындарында және колледждерде білім алуда. Жыл сайын облыстық жергілікті атқарушы орган да балалардың оқуына арнайы гранттар бөледі.
Мәжілісте өткен кездесуде депутат Нұртай Сәбильянов елімізде жасөспірімдердің құқығын қорғауға қатысты қандай заңдар қабылданып жатқанын әңгімелеп берді. Осы басқосуға арнайы қатысқан Мәжіліс депутаттары Майра Айсина мен Ержан Рахметов өз ойларын айтты және тәрбиеленушілердің сұрақтарына жауап берді.
Өз кезегінде Науалы балалар үйінен келген балалар да депутаттарға көкейлеріндегі сұрақтарын қойып, алдағы арман-мақсаттарымен бөлісті. «Нұр Отан» партиясынан сайланған халық қалаулысына ризашылықтарын айта келіп, туған жерінің тілегін жеткізді. 10 сынып оқушысы Айжан Камалова өздерін нендей мәселелер толғандыратынын айтты.
Кездесуде балалар үйі түлектерін пәтермен қамту, әскери салада білім алу және ұлттық бірыңғай тест мәселелері қозғалды. Жасы 18-ге толған бірқатар тәрбиеленушілер ертең, 3 сәуір күні өтетін президенттік сайлауға тұңғыш рет қатысатындықтарын және өз таңдауларын жасайтындықтарын мәлім етті.
Қонақтар Парламенттің бірлескен отырыс залын және Мәжілістің жалпы отырыс залын аралап көрді.
---------------------------------
Суретті түсірген Аманқұл ДҮЙСЕНБАЕВ.