Ертерек дауыс берсең, сыйлық аласың

Бүгін Қазақстан Республикасының президенттігіне кандидат­тар­дың және олардың сенім білдірілген адамдарының, сондай-ақ өзге де азаматтардың үгіт жұмыстарын жүргізуіне болмайды, тыйым салынған. Осыған байланысты кеше Орталық сайлау комиссиясының хатшысы Бақыт Мелдешов БАҚ өкілдерін сайлауалды үгіт шараларының қалай өткенінен хабардар етті. ОСК хатшысының айтуынша, президенттікке кандидаттардың сай­­­лауалды үгіт науқаны заң бұзушы­лықсыз өтті деуге болады. Науқан барысында біршама кемшіліктер де кездескен. Олар негізінен кейбір кандидаттардың билбордтары мен сыртқы жарнамаларының мерзімінен кешіктіріліп орналастырылуы­на байланысты. Дегенмен, аталған кемшіліктер шұғыл түрде шешіліп, қалпына келтіріліпті. – Сондықтан үгіт науқаны бары­сында айтарлықтай заң бұзушы­лықтар болды деп айта алмаймыз, – деді Бақыт Мелдешов осы жөнінде. – Кандидаттардың үгіт жұмыстары бүгін (1 сәуір) сағат 24.00-де аяқ­талады. Ілінген билбордтар, плакаттар мен парақшалар алынбайды, сол орындарында қалады. Орталық сайлау комиссиясының хатшысы сөз барысында дауыс беруге келген сайлаушыларға аумақтық сайлау комиссиялары тарапынан ынталандыру сыйлықтары берілуі мүмкін екендігін де айтып қалды. Сыйлықтар сайлау учаскесіне ал­ғаш­қылардың бірі болып келген немесе сайлауға алғаш рет дауыс берген сайлаушыларға берілетін сияқты. – Бұл – қолдауға тұратын шара. Сыйлықтың қандай және қаншалықты мөлшерде болатыны жергілікті атқарушы органдардың мүмкіндіктеріне байланысты, – деді ол. – Бірақ оларға ешқандай да нұс­қау берілген жоқ. Естуімізше, сый-сияпат ұйымдастыруды қолға алып жатқан сайлау учаскелері де бар. Әлисұлтан ҚҰЛАНБАЙ.