Осындай да кіріс-шығыс болады екен

Көп пәтерлі тұрғын үйлердің кіреберістеріндегі электр энергиясы үшін ақы алу мақсатында «үйдің жалпы шығыны үшін» деген атауды түбіртекке кіргізіп қойған жекеменшік пәтер иелері кооперативтері өздеріне тиесілі жауапкершілікті тұрғындардың мойнына артып қойғысы келеді. Осы мәселе туралы шағымданған тұрғындардың арызы «Нұр Отан» партиясы қалалық филиалының отырысында қаралды. Дәл осы іспетті жүктемені 20 шақ­ты жекеменшік пәтер иелері коо­пе­ративтері енгізген. Ал партияға арыз­данған тұрғындар ПИК-тердің келі­сім жасамағанын айтады. Жиынға ТҮКШ бөлімінің мамандары, тұрғын үй инс­пекциясы, «Шығысэнерготрейд» ком­паниясының, ПИК қауымдастығы мен қоғамдық ұйымдар өкілдері қатысты. Түбіртекке «үйдің жалпы шығыны үшін» деп жазылғандықтан энергетика мамандары тұрғындарды артығымен ақы төлеуге мәжбүр еткен. Тіпті, электр энергиясымен қамтушы мекеме, кейбір тұрғындарға үйдің кіреберісіндегі жарық үшін, яғни жеделсаты жұмыс­тарымен жарықтандыруға қатысты да есеп жібере бастады. Бұл түбіртектегі жазбаны энергетиктер қарыздары үшін жарық көзінен ажырата бастағанда, өздері ақы төлемеген үйлердің коопе­ра­тивтері ойлап тапқаны белгілі болды. Осындай айлакерлікпен ПИК-тер өз шығындарын тұрғындар мойнына артпақ болған. – Бізге түбіртектегі қосым­ша­ны ПИК қауымдастығының өкіл­дері, осы мәселені шешудің бірден-бір бағыты деп ұсынды, – дейді «Шығысэнерготрейд» ЖШС Семей өңірі бойынша өндіру басқармасының директоры Светлана Винтер. – Сондықтан да тұрғын үй қатынастары туралы заңға қарап, ПИК-тердің хаттамаларына арқа сүйей келе, көп пәтерлі үйлердегі немесе жеке үйлер, яки ПИК-тері жоқ үйлердегі шаршы метрлерді есептей келе, шыққан шығынды бүкіл үйге бөліп беріп, «үйдің жалпы шығыны үшін» деген жазбаны түбіртекке енгізіп қойған болатынбыз. Қала әкімі жанындағы қоғамдық кеңестің жетекшісі Николай Исаевтың айтуынша, бұл үшін тұрғындар­дың барлығы бірауыздан келісуі керек бол­ған. Ал «Нұр Отан» партиясына арыз­данған тұрғындардың айтуынша, ешкім келісім бермеген. Сондықтан да тұрғындардың арызданбаған жерлері жоқ. Бір қызығы, 20 ПИК-тің әрқайсы­сы қаладағы ең ірі жекеменшік пәтер иелері кооперативтері, оларға қаладағы ең көп пәтерлі тұрғын үйлер қарайды. Тұрғындардың айтуынша, «үйдің жалпы шығыны үшін» дегенге ақша төлегенмен, қосымша кіреберістегі жарық, жеделсаты ақысын бұрынғыдай тағы да төлеп отырған. Яғни, бірде-бір пәтер иелері кооперативі жалпы үй қыз­меті мен жеделсаты үшін электр жары­ғына жүктеген төлемнен, не пай­да­ла­нылған қажеттіліктер құнынан, не жеделсаты ақысының құнынан бұл ақ­шаны шегермеген. – Мен ПИК қауымдастығының заң­гер­леріне бір ауыз сөз айтқым келеді, – деді «Нұр Отанның» Семейдегі фи­лиа­лы төрағасының орынбасары Зуль­фия Жамал­тдинова, – ПИК-тер әу баст­а сіз­дер­ден құқық саласы бойынша қалай істеу, не істеу керектігі жөнінде көмек сұ­ра­­ған шығар? Сіздер неге ПИК бас­шы­л­арына бұлай істеу заңға қайшы әре­кет бо­ла­ды деп түсіндірмедіңіздер. Адам­дар қол қоймаса, жиналысқа қатыс­паса мұн­дай шешім шығару заңға қайшы әрекет. Жиынға қатысушылар да өз пікір­лерлерін жеткізді. Айталық, бір саладан екіншіге ауысқанда, төлемнің ауысу тәртібін тексеру керек. Пәтер ие­лері кооперативі өздеріне жүктелген сенімді ақтамады. Оған таусылмай­тын келеңсіздіктер дәлел. Сондай-ақ, тұрғын үй қатынастарын реттеуге мемлекеттің мүлде қатыспауы мәселені ушықтыра түсті. Заңгер Қайрат Тастекеев ПИК-терді қайта құру немесе жергілікті әкімші­ліктің қарауына беру керектігін айтты. Яғни, бақылаусыз қалғандықтан аталған проблемалар орын алды. Қаржылық жағ­дайын тексеретін аудиторлық ком­пания жоқ. ПИК жетекшілері жертөледе су, жылу құбырлары істен шықса артық ақша жоқ деуге үйреніп алған. Жиын соңында партия өкілдері Мәжіліс депутаттарына ПИК-тер тура­лы заңнаманы қайта қарастыру жөнінде өтініш жолдауға шешім қабыл­дады. ПИК-тердің Семейде ойлап тапқан «жаңа түбіртегімен» про­куратура айна­лысатын болды. Раушан НҰҒМАНБЕКОВА СЕМЕЙ