Демократиялық үдерістердің заңды жалғасы

Мемлекет басшысы Нұрсұлтан Әбішұлы Назарбаев­тың өткен аптадағы билік тармақтары арасын­да өкілеттіктерді қайта бөлу жөніндегі Қазақстан халқына жариялаған Үндеуі, онда көтеріп отырған мәселесі өте орын­ды. Ол көптен бері пісіп-жеті­ліп келе жатқан саяси-ғаламдық мәні бар зор мәселе еді. Айтулы мәсе­ленің шешімін қалай болғанда да Прези­дентіміздің өз бастамасымен шешудің де маңызы зор еді. Ал Елбасымыздың бастаманы өзі көтеріп, демократиялық үдерістерді аяғына дейін дамыта түсуге ықпал еткісі келгенін өте дұрыс әрі дәл уақытында қолға алынған тұжырым деп ойлаймын. Әрбір мемлекет органы өкілеттігінің құқықтары болсын, Парламенттің неме­се Президенттің құқық­тары болсын, немесе одан төменгі органдардың құқық­тары болсын, бәрі де заман­ның ағы­мына, қоғамның өрке­н­деуіне, уақыт талабына бай­ланыс­ты қайта қаралып, өзгер­тіліп, толық­тырылып, алға қадам басып отыруы тиіс. Сондықтан да Прези­денті­міздің бүгінгі көтеріп отырған идея­сын мен ең қарт қоғамдық-саяси қай­­раткер ретін­де өте орынды деп санай­мын. Біз бұл мәселені қайткенде де қолдап, әрі қарай өркендете түсуге тиіспіз. Конституция, яғни еліміздің Ата Заңы – қатып-семіп қалған заң емес. Конституция да, Конституцияның әрбір тарауы да заман талабына, мемлекетіміз алдына қойып отырған мақсаттарына, билік шешіміне сай мезгілі жеткен кезде толықтырылып, қажетті өзгерістерін енгізіп отыруы керек. Ал Елбасымыз Нұрсұлтан Назарбаевтың кешегі «Қазақстанның үшінші жаңғыруы: жаһандық бәсекеге қабілеттілік» деп аталатын Қазақстан халқына Жолдауында айтылған «Бес негізгі басымдық», «Маңызды кешенді үш міндет» сияқты бағыттардың бәрі де көңілімізден шығып отыр. Тек ең бастысы, сол бағыттарды жүзеге асыруда асығыстыққа салынбауымыз қажет. Асығыс істелген іс олқылау болып қалмақ. Сондықтан беделді де білікті азаматтарды Президенттің айналасына шоғырландырып, сол жерде біраз мәселені шешіп барып, әрі қарай дамыта берген жөн деп ойлаймын. Парламент расымен де мемлекет қалауындағы мәселелерді шешіп, маңызды істерге араласып отыруы тиіс. Парламенттің елімізді, мемлекетті өркендету мақсатында Президентпен күш жұмылдыра жұмыс істеуі – заман талабы. Сондықтан Президентіміздің бұл бастамасын барынша қол­дай­мын әрі орынды, өрісті бастама деп ойлаймын. Сұлтан САРТАЕВ, заң ғылымдарының докторы, Ұлттық ғылым академиясының академигі