Осыдан дәл бір ай бұрын сайлауалды насихат науқаны басталған кезде Қазақстан Республикасының президенттігіне кандидат Нұрсұлтан Назарбаев «Нұр Отан» ХДП орталық аппаратындағы өзінің республикалық орталық штабына келген болатын. Кеше түнгі сағат 24.00-де, ел халқы өзінің тарихи таңдау сәтін жасаған күннің соңында Нұрсұлтан Әбішұлы сайлаудың алғашқы нәтижесімен өз жақтастарымен бірге танысу үшін орталық штабқа екінші рет келді. Елбасын мұнда орталық штабтың мүшелері, сенімді өкілдері мен волонтерлер, жастар үлкен құрметпен қарсы алды. Сайлау кезінде Нұрсұлтан Назарбаевтың кандидаттығына қолдау білдірген елімізге танымал азаматтардың көп болғандығы белгілі. Осы жолғы басқосуда біз солардың арасынан Сенат депутаты Қуаныш Сұлтановты, Ғылым академиясының президенті Мұрат Жұрыновты, Олимпиада чемпиондары Ольга Шишигина мен Илья Ильинді, атақты скрипкашы Айман Мұсақожаеваны, басқа да бірқатар танымал азаматтарды байқап қалдық.
Ең алдымен сөз тізгінін алған «Нұр Отан» ХДП Төрағасының орынбасары Нұрлан Нығматулин осы жиналған қауымның дәл осы сәтте орталық теледидар арқылы берілетін Орталық сайлау комиссиясының сайлаудың алғашқы нәтижесі туралы қорытындысын асыға тосып тұрғандығын айтып, жұртшылық назарын теледидар хабарына аударды. Осы сәтте теледидар жүргізушісінің саңқылдаған дауысы да естіліп сала берді. Орталық сайлау комиссиясының төрағасы Қуандық Тұрғанқұловтың алғашқы нәтиже туралы хабары тыңдалды. Ол өңірлерден келіп түскен алғашқы мәліметтер бойынша, еліміздің алыс түкпірлері мен шетелдік өкілдіктердегі Қазақстан азаматтарының дауысын есепке алмағанда (олардың дауыс нәтижесі кейіннен қосылады), дауыс беруге сайлаушылардың 89,9 пайызы қатысқандығын хабарлады. Соның ішінде Ақмола облысында сайлаушылардың 93,1 пайызы, Ақтөбе облысында 95,1 пайызы, Алматы облысында 96,9 пайызы, Атырау облысында 91,70 пайызы, Шығыс Қазақстан облысында 94 пайызы, Жамбыл облысында 95,3 пайызы, Батыс Қазақстан облысында 92,60 пайызы, Қарағанды облысында 90,8 пайызы, Қостанай облысында 94 пайызы, Қызылорда облысында 94,9 пайызы, Маңғыстау облысында 94,2 пайызы, Павлодар облысында 80,3 пайызы, Солтүстік Қазақстан облысында 92,3 пайызы, Оңтүстік Қазақстан облысында 93,1 пайызы, Астана қаласы 69,1 пайызы, Алматы қаласы 68,5 пайызы қатысқан.
Еліміздің 14 облысы мен Астана және Алматы қалаларында Социологтар мен саясаттанушылар ассоциациясы сайлау нәтижесі бойынша арнайы зерттеулерін жүргізген екен. 102 сайлау учаскесінде 100 мың адамның арасында жүргізілген осы exit-poll-дың ресми емес дерек көздері бойынша сайлаушылардың дауыс беруге Қазақстан бойынша қатысуының орташа көрсеткіші 84,9 пайызды құраған. Осы сайлауға қатысушылардың 94,8 пайызы Нұрсұлтан Назарбаевтың кандидатурасын жақтап дауыс берген.
Бұл сайлау қорытындысы туралы бейресми дерек көзінің алғашқы ақпараты. Ал нақты қорытынды кейіннен жарияланады. Сондықтан осы мақала барысында қасаң тілмен сөйлеуге тура келіп тұр. Дегенмен, алғашқы мәліметтерді естіген сәтте ет жүрек дір етпей қоймайды. 4 кандидаттың арасынан 94 пайыз қолдауға ие болу, бұл халық сенімі мен махаббатына бөлену деген сөз. Осы мәліметті естігенде Елбасының өз жүрегі де елжіреп кеткендігін сезінгендей болдық. Елбасы былай деді:
«Құрметті қазақстандықтар, отандастар! Міне, жаңа ғана біздің тәуелсіздігіміздің 19 жыл ішіндегі тарихи сайлаудың алдын ала мәліметтері белгілі болды. Тарихи сайлау дейтініміз – өйткені, біз күллі әлемге тағы бір рет біздің қоғамымыздың демократия жолында екендігін дәлелдедік. Дәл осы күні бүкіл әлемнің назары Қазақстанға ауды. Сайлау ашық, таза өтті. Құқық қорғау органдары заңдылықты қадағалады. Президенттікке барлық кандидаттарға тең құқық, бұқаралық ақпарат құралдарына қолжетімділік, оларға барлық облыстар, аудандар, қалалар, ауылдарда өз бағдарламаларын, өз идеяларын жариялап сөз сөйлеулеріне мүмкіндік берілді. Біз – ашық қоғамбыз. Сондықтан біздің сайлауымызды бақылауға 1059 шетелдік байқаушылар, 200 шетелдік журналистер келді. Оларға дауыс беру барысына кедергісіз қатысуға, сайлау барысын қадағалауға мүмкіндіктер жасалынды», дей келе экзит-пулдың осы қорытындысы бойынша Қазақстан халқының өзі жариялаған реформалар курсын, қоғамды жаңарту, қазақстандықтардың, әрбір отбасы мен әрбір адамның әл-ауқатын жақсарту бағытын тағы да қолдағандығын айтты. «Осы оқиғаға байланысты мен барлық қазақстандықтарға осындай биік сенімдері үшін алғысымды білдіремін. Осы жерде ұйымдастырылған, барлық облыстарда жұмыс істеген қоғамдық штабыма, штабтың барлық қатысушыларына, тәуелсіздіктің 20 жылы бойына өзіммен бірге келе жатқан серіктестеріме, достарыма ыстық ықыласымды жеткіземін», дей келе, сайлауда сайлау күні ғана жұмыс істегендер емес, одан көп бұрын іспен өзін дәлелдей алғандар жеңіске жетеді деп сенгендігін мәлім етті. Демек, 20 жыл бойы жұмсалған күш-жігермен еңбек босқа кеткен жоқ. Бұл – сыннан өтудің нағыз емтиханы болды.
Елбасы өзіне қолдау көрсеткен 29 мың сенімді өкілге, 88 мың волонтерге алғысын жеткізді. «Әсіресе, менің ұстанған бағытыммен жеке өзімді қолдап, үлкен белсенділік танытқан жастарымызға ерекше алғысымды айтамын. Осы ретте мен кандидат ретінде жеңіске жетсем – мұны бүкіл еліміздің, Қазақстанның жеңісі деп есептеймін», деді.
Елбасы бүгін сайлауға қатысып, халқымыздың бірлігін көрсеткен барлық сайлаушыларға үлкен алғысын білдірді. Қазіргі біздің барлық жетістіктеріміз біздің бірлігіміздің, достығымыздың, көпұлтты Қазақстандағы әрбір адамның құқығы мен еркін құрметтеудің нәтижесі екендігін айта келе сайлауға қатысқан басқа да кандидаттарға өз идеяларын білдіргендігі үшін ыстық ықыласын жеткізді. Олардың ұсыныстарында да ден қоярлық жәйттер бар екендігін, олардың алдағы уақытта назарға алынатындығын айтты. Әрбір үйге, Отанымыздың әрбір азаматына бақыт пен береке тіледі.
Он-лайн режімі арқылы осы басқосуға қатысқан Алматы, Қостанай облысындағы жақтастары Елбасын жеңіспен қызу құттықтады. Өңірлерде сайлау учаскелеріне халықтың мерекедегідей жоғары көңіл-күймен барғандығын хабарлап, өздерінің Елбасымен бірге екендіктерін жеткізіп, Нұрсұлтан Әбішұлына зор денсаулық, ұзақ өмір тіледі.
Басқосу қорытындысында «Нұр Отан» ХДП Төрағасының орынбасары Нұрлан Нығматулин Нұрсұлтан Әбішұлын Қазақстанның негізін қалаушы, Көшбасшысы ретінде осы ұлы жеңісімен құттықтап, гүл ұсынды. Басқосу орталық штабқа жиналған жастардың үлкен қошеметімен аяқталды. Халықтың осынау құрметіне тәнті болған Нұрсұлтан Әбішұлы да өз тарапынан оларға үлкен құрмет көрсетіп, көптеген жастардың қолын алып, ыстық ықыласын білдірді.
Сұңғат ӘЛІПБАЙ, Суреттерді түсіргендер С.БОНДАРЕНКО, Б.ОТАРБАЕВ.
