• 15 Ақпан, 2017

Озық елдердің тәжірибесі бізге де үлгі

344 рет

көрсетілді

2 мин

оқу үшін

Egemen Qazaqstan

Алматыдағы Абай атындағы Қазақ мемлекеттік академиялық опера және балет театрында Елбасы Нұрсұлтан Назарбаевтың «Қазақстанның Үшінші жаңғыруы: жаһандық бәсекеге қабілеттілік» атты Жолдауын талқылау бойынша дөңгелек үстел өтті. Шараға мемлекет және қоғам қайраткерлері, аталмыш ұжымның басшылары мен қызметкерлері қатысты. Іс-шараның негізгі мақсаты саяси тәрбие және Елбасы Жолдауында айтылған өзекті мәселелерді талқылау болды. Дөңгелек үстел жұмысын ашып берген Абай атындағы МАОБТ-тың бас директоры, Қазақстанның еңбек сіңірген қайраткері Асқар Бөрібаев, сондай-ақ, Елбасының Үндеуінде айтылған бірқатар құзыреттерді Парламент пен Үкіметке беру көптеген дамыған озық елдердің тәжірибесінде кездесетінін атап көрсетті. «Осы тұрғыдан келгенде, аталған бастама жаһандық даму жолында елімізге тың серпін беріп, тынысымызды ашатын сенімді құрал болмақ. Мәдениет саласының мамандары жан-жақты үн қосып жатыр. Біздің ұжым басшылығы мен қызметкерлері де Елбасы ұсынған реформаны талқылай келе, толыққанды қолдайды», деп мәлімдеді. «Бәсекеге қабілеттілікті арттырып, мемлекетті нығайтатын үлкен күшке ие болу үшін экономикалық жаңа қадам жасаудың маңызы зор. Президент ұсынған реформа тың бастамаларға серпін береді. Өткен күннен сабақ алып, болашаққа нық сеніммен қарауымыз керек», – деді жиында сөз алған саясаттанушы Замир Қаражанов. Аталған реформа – ел болашағына жасалған нақты қадам. Ал сан сараптан өткен саяси Үндеу мемлекетіміздің дамуындағы тарихи сәт. Тәуелсіздік алған жылдар ішінде экономиканың барлық талаптарына жауап бере алатын мемлекеттік басқарудың көп қырлы моделі дүниеге келді. Қазақстанның әрбір азаматы бұл реформаны талқылауға белсенді түрде үн қосуы қажет. Қоғамдағы демократиялық үдерістерді дамытып, қуаттандыруда жаңа бетбұрыстың маңызы зор деді – жиынға қатысушылар бірауыздан. «Келісіп пішкен тон келте болмас». Еліміздің барлық қалалары мен аймақтарында қызу талқыланып жатқан реформаға үн қосушылардың саны күн санап артып отыр. Осыған қарап, еліміздегі саяси ұйымдар мен мемлекеттік мекемелер ғана емес, реформаны талқылауға қатысқан еліміздің әр азаматы мемлекетіміздің болашағына бей-жай қарай алмайтынын аңғарамыз. Арман ОКТЯБРЬ, журналист АЛМАТЫ