Баға қанша құбылса да...

ДЕПУТАТТЫҢ  УӘЖДЕРІ ШЫНДЫҚҚА ЖАНАСПАЙТЫНЫН ЖЕРГІЛІКТІ ЖЕРДЕГІ ЖАҒДАЙ АЙҒАҚТАЙДЫ Облыстық ауыл шаруа­шылы­ғы басқармасындағылар «Егемен Қазақстанның» облыстағы тілшілер қосынымен хабарласып, Мә­жі­ліс депутаты Петр Дмит­ри­ен­коның республикалық баспасөз мәс­лихаты арқылы таратқан мә­лім­демесінің кей тұстарымен үз­ілді-кесілді келіспейтіндерін білдірді. «Халық қалаулысы бағаны тұрақтандырудың жолдарын ұсы­нып, Үкімет назарын аударғаны дұрыс-ақ. Алайда, Солтүстік Қа­зақстан облысынан келтірген мы­салдары ешқандай шындықпен үйлеспейді. Оның жергілікті аху­алды терең зерттемегені көрініп тұр», деп қара қазандай өкпе­ле­рін жайып салды. Олардың ренжитіндей жөні бар. Депутат «Солтүстік Қазақ­стан облысының ауылдық округтерінде сиыр еті 480 теңге тұрса, көтерме сауда жасаушылар ет ба­ғасын 3000 теңгеге дейін (астын сызған – біз) шарықтатып жіберген» деп айды аспанға бір-ақ шы­ғарған. Дмитриенконың солтүс­тік­қазақстандықтардың өңі түгіл түсіне енбеген бағаны қайдан ал­ғаны түсініксіз. Басқарма бастығы Нұрлан Биболаев қол қойған ан­ықтамаға сүйенсек, сиыр еті елді мекендерден 650-720 теңгеге са­тып алынып, базарларда 750-800 теңгеге сатылуда. Қой еті де осы шамалас. Шошқа, құс етінің ба­ға­сы төмен. Сол сияқты халық қа­лау­лысының бидай бағасының 40 мың теңгеге дейін көтеріліп кетуіне байланысты Петропавл нан пісіру комбинатында нанның баға­сы 48 теңгеге жетіп, оның соңы 5 фирмалық дүкенінің жабылуы­на алып келді деген пайым­дау­ла­ры ақиқат ауылынан алыс жатқ­а­нын аталмыш кәсіпорынның ком­мер­­ция­лық директоры Серік Рамазанов жоққа шығарды. Ол берген анықтамада облыстық әкім­дік­пен жасалған меморандумға сәй­кес би­дайдың әр тоннасы 26 500 тең­геден босатылып, бір бөлке нан 45 теңгеден аспайтыны, дү­кен­­дер­дің үзіліссіз жұмыс істеп жат­қаны келтірілген. Бағалардың қай жерде болсын сынаптай мың құбылып тұрғаны рас. Сол себепті көп тұтынатын т­а­уарлар мен азық-түлікті қым­бат­татпау – көкейтесті мәселелер­дің бірі. Қызылжар өңірінде аса қа­жетті азық-түлік түрлері мен та­ғам­дардың бағасын тұрақтан­ды­рып, қолжетімді етудің мүм­кін­дік­тері жан-жақты қарастырыл­ған. Бір мысал. Қырғызстаннан жеміс-көкөністі тікелей жеткізу жұмыстарын жүйелі ұйымдас­ты­ру­дың нәтижесінде картоп, сәбіз, қырыққабат арзандады. Қант, кү­ріш, өсімдік майы тұрақты бақы­лауда. Ет-сүт өнімдерінің бағасы ежелден қолжетімді. Айтпағымыз, бағаларды тұ­рақ­тандыру мақсатымен жергілікті билік орындары тарапынан ат­қарылып жатқан кешенді шара­лар­ды біле тұра Парламент Мәжі­лісінің депутаты, жерлесіміз П.Дми­триенконың деректердің өң­­ін айналдырып, өтірікті шын­дай, ақсақты тыңдай етуі халық қа­лау­лысы деген мәртебелі атқа жа­ра­сып тұрған жоқ. Өмір ЕСҚАЛИ. Солтүстік Қазақстан облысы.