Қаржымызды Бейбітшілік қорына аударғанбыз

«Тараз» триосы қазақ даласына ғана емес, алыс-жақын шет елдерге де танымал өнер ұжымы. Өткен ғасырдың 70-80-жылдарынан бастап қазақ даласын әнге бөлеп, әйгілі Кенен ақынның көркем әндерін қазақ кеңістігіне қайта насихаттаған да осы трио болатын. Бүгінгі таңда «Тараз» триосы сахнадан көп көрінбейді деген сөз де халық арасында айтылып қалады. Осы мақсатта «Тараз» триосының әншісі, Қазақстанның еңбек сіңірген қайраткері Асылхан Шүңірековпен хабарласып, сұхбаттасқан едік. – Біз Жамбыл облысының шеңберінде өткізіліп жатқан ешқандай іс-шарадан қалып жатқан жоқпыз, – деді біз­бен әңгімесінде Асыл­хан Шү­ңіреков. – Ал енді Алма­­ты, Астана сияқты ірі қа­ла­ларға барып, жекелеген концертімізді беріп жатпа­ғанымыз шындық. «Тараз» триосының тарихы тереңде. Бірақ біз телеарналардан аз көрінеміз. Одан кейін қазіргі шоу-бизнес те басқа арнаға бұрылып кетті. Топ-топ болып, сол шоудың төңірегінде ғана жүрген әртістер бар. Бізден гөрі солар көбірек көрінеді. Осыдан біраз уақыт бұ­рын «Кешкі кездесу» бағ­дар­ламасына түсіп келдік. Ол жерде трионың тарихы мен тағдыры туралы айтылды. Халық әртісі Алтынбек Қоразбаев, Қазақстанның еңбек сіңірген қайраткері Мұхтар Рахманқұлов, одан кейін бүгінде Жамбыл ауданы, Жамбыл ауылында фермер болып істейтін Ал­тынбек Бекмұратов трио төңі­регінде әдемі әң­гіме өр­бітіп, тарихына тоқтал­ған болатын. Кейін­нен «Қазақ­стан» ұлттық арна­сының шақыртуымен «Да­ра жол» бағдарламасына қатыстық. Жылдар өткен сайын «Та­раз» триосының құрамы да өзгерді. Бүгінде Талас ауданы әкімдігі мәдениет және тілдерді дамыту бөлімінің басшысы болып жүрген Пернебек Оспанов, фермер Алтынбек Бекмұратов, Берік Қалиев деген де азаматтар трио құрамында өнер көрсеткен. Ал мен ауыл­ға, Берік әскерге кеткен уа­қыттарда трио тарап кетпес үшін, Дүйсенбек, Есен­бек, Сәтжан деген азаматтар біздің орнымызға өнер көрсетіп жүрді. – Ең алғаш Мейрамбек Беспаевтың талантын танып, сахнаға алып шық­қан сіз екенсіз. 1987 жылы Мей­рам­бекті Мәскеуге де алып барыпсыз. Бірақ қазір ол кісіні халық Алтынбек Қора­збаевтың шәкірті ре­тін­де таниды. Осы жайында айтып берсеңіз... – Мейрамбектің Алте­кеңнің шәкірті екені рас. Мейрамбекті әуелі мен көр­дім. Себебі, біз Мейрам­бектің бала күнінде-ақ әкесі Әбіләшіммен дос болдық. Анасы Жібек те керемет адам. Ол кісілердің жасы менен үлкен. Бірақ әйтеуір студент күнімде танысып, содан жақсы араласып кет­тік. Ол кісілер жер үйде, біз жатақханада тұрамыз. Сен­бі, жексенбі сайын Әбе­­кең­нің үйінде болып, ән айтамыз. Әңгіме-дүкен құра­мыз. Мейрамбек ол кезде кішкентай бала. Мен домбырамен ән салсам, соған қызығады-ау деймін, әйтеуір ұйып тыңдап отырады. Содан біз де қолына домбыра беріп, ән айтқызатынбыз. Кейін Жамбыл қаласында үлкен деңгейде ақындар айтысы өтті. Сол кезде Мейрамбек алғаш рет сахнаға шығып, елге өнер көрсеткен болатын. Аяз Бетбаевтың термесін шырқап, елді баураған еді. Содан бала Мейрамбекті айтыскер ақын Серік Қалиев сахнадан көтеріп алып кетті. Қайтадан бала Мейрамбектен ән айтуын сұрадық. Кішкен­тай баланың домбырамен ән айтқаны ол кезде таң­сық болатын. Халықтың да ықыласы ерекше болды. Мен 1986 жылы отбасы жағдайымен Мойынқұм ауданы, Талдыөзек ауылына көшіп кеттім. Сол ауылда кәсіподақ комитетінің төрағасы болып сайландым. Сонда да Әбіләшім Бес­паев­пен достығымызды үзген жоқпыз. Кейіннен аудан­дық кәсіподақ комитеті концерт ұйымдастырып, сонда Мейрамбекті алдырып, ән сал­дырдық. Концерттен түс­кен ақшаны Кеңес Ода­ғының Бейбітшілік қорына аудар­дық. Ол уақытта қалтаға ақша алып қалу деген болмайтын. Кейін 1987 жылы Мәс­кеуден шақырту келді. Содан Қордай ауданынан әнші Қарлығаш Қожағазина, Талас ауданынан әнші, марқұм Алтынбек Оразбеков, мен және Мейрамбек төртеуміз Мәскеуге бардық. Сонда Мей­рамбек туралы «Мос­ков­ские правда» газетінде үлкен мақала жарияланды. Ол уақытта Алтынбек Қоразбаев облыстық филармонияның директоры еді. Кейіннен Алтекең Мейрамбекті өз қам­­­­қорлығына алып, әндерін үй­ретіп, өзіне шәкірт қылды. Ал­матыға алып кетіп, үлкен әнші болып қалыптасуына еңбек сіңірді. Әңгімелескен Хамит Есаман, «Егемен Қазақстан» Жамбыл облысы