Жарқырайды «Алтын ауыл» оттары

Аудан орталығы – Қаскелең қаласының күншығысында алыс­тан менмұндалайтын, көз тартып, көңіл қуантатын деп айтуға анық келетін бір  әдемі жер бар. Оны «Алтын ауыл» шағын ауданы деп  атайды. Шынында да,  «Алтын ауыл» десе дегендей-ақ. Қаздай тізіліп, қатар қонған, сәулет өнерінің соң­ғы үлгілеріне сай салынған 7-9 қабатты зәулім үйлер қаланың ажарын айрықша кіргізіп, көркін өте көркем етіп тұрғаны анық. Бүгінде өзінше әдемі қала­шыққа айналған шағын аудан­дағы биік  үйлерде жүздеген от­ба­­сы алаң­сыз өмір сүріп, еңбек етуде. Бала-шаға өсіруде. Әсі­ресе, 2008-2010 жылдары мемлекеттік «Тұр­ғын үй» бағ­дарла­масы бо­йын­ша құрылыс қарқын­ды жүр­гізіліп, ипо­текалық және жалға беру жү­йесімен талай жыл пәтер кілтін армандағандар үй алды. Олардың ішінде Ұлы Отан соғы­сының ардагерлері, көп ба­лалы аналар, мү­гедектер, жас  мамандар, мем­лекет­тік сала қыз­мет­­керлері, мұға­лімдер, дәрігер­лер бар. Сөз жоқ, бұл – еліміздегі аса маңызды мемлекеттік-әлеуметтік саясаттың жемісі. Тіпті, мұны ел тәуелсіздігінің жеңісі де деген болар едім өз басым. Бұл үшін Елбасына, облыс, аудан басшы­ла­рына айтар алғысым көп. Біз осы барлық тұрмыстық жағдайы бар ықшам ауданнан пәтер алғандардың біріміз. Ұзақ жыл мектепте мұғалім болып, жас ұрпаққа білім мен тәрбие бердік. Сөйтіп, қиындығы да, қызығы да жетіп артылатын ұстаздық жо­лында жүз­деген шәкіртті оқытып, үлкен өмірге қанат қақтырдық.  Қазір құрметті демалыста елімнің амандығын тілеп отырмыз. Жұбайым да ел құрметіне бөленген азамат. Екеуіміз ерлі-зайыпты ретінде бірнеше бала  тәрбиелеп өсірдік, не­мере сүйдік. Балаларымыздың ал­ды қазақ жерінің кіндігі – Астанада жұмыс істейді. Сөзімнің соңында айтарым, ай­қын жеңіске жетіп, халық қа­ла­уымен  қайта Президент болып сайланған Нұрсұлтан Әбішұлының  еңбегіне тек табыс, жетістік тілейміз! Майра ӘБДІРӘСІЛҚЫЗЫ, зейнеткер ұстаз.