Тасқын тыйылмай тұр

Батыс Қазақстан облысында су тасқынына байланысты күр­делі жағдай қалыптасып отыр. Осыған орай өңірге 11 сәуір күні Төтенше жағдайлар министрі Владимир Божко келген болатын. Ол облыс басшысы Бақтықожа Ізмұхамбетовпен бірге су басқан жерлерді аралап шығып, төтенше жағдайға орай шұғыл кеңес өткізді. Министр су тасқынынан зардап шеккен тұрғындардың бәріне қажетті көмек жасала­тынын жеткізді. Облыстық төтенше жағдайлар департаментінен түскен мәлі­мет­ке қарағанда, Деркөл, 1-ші Шежін және 2-ші Шежін, Быковка өзен­дерінің тасуы шырқау шегіне жетсе, Жайық пен Шағанның суы көтерілу үстінде. Зеленов ауданы Зеленый ауы­лы тұсында Деркөл суы 61 үйге кіріп, 40 тұрғын қауіпті жерден көшірілді. Бакаушин ауылында 49 үйді су алып, 35 адам басқа жерге орналастырылды. Быковкадан Хамин елді мекені зардап шегіп, 30 үйді су басты. Тасқала ауданы орталығында Деркөлдің көктемгі мінезінен 60-тан астам үй зиян шегіп, 550 адам көшірілді. Саман тастан салынған үйлердің алды құлап та жатыр. 1-ші Шежін өзенінен Атамекендегі 40-тан астам үйді су алған. Теректі ауданы Подстепный ауылында 21 үй осындай күйге ұшырады. Зеленов ауылының Белес елді мекеніне де су кірді. Орал қаласы төңірегіндегі елді мекендерді де су алуда. Сон­дық­тан саяжайларда, Самал-1, Самал-2 ауданы, Чувашка және бас­қа жерлерде тұрып жатқан адам­дар, «Жас дәурен» балалар кешені, «Ивушка» санаторийі, облыс­тық кардиоорталық көшірілді. Маштаков, Мичурин ауылдары да осыған ұқсас жағдайды бастан кешіруде. Құтқару жұмыстарына мың­нан астам адам жұмылдырылып, 292 техника қатыстырылды. Со­ны­мен қатар республиканың өзге өңір­лері­нен де құтқарушылар көмекке келгендігін айта кету керек. Құтқарушылардың сөзіне қа­ра­ғанда, Деркөл, Шағанға қоса Жайық өзенінің қоса тасуы жағ­дайды қиындатып жіберді. Негізі Жайық он күндей кейін таситын. Бастысы, қолдан келген шара­лар­дың бәрі жасалынуда. Абырой болғанда, мал шығын болға­ны­мен, адамдар аман. Темір ҚҰСАЙЫН. Орал.