![](https://www.egemen.kz/wp-content/uploads/2017/03/Fabrika-Formatov141A9755-3.jpg)
Т.Жүргенов атындағы Қазақ ұлттық өнер академиясында осы оқу ордасының «Көзімнің қарасы» мәдени-танымдық клубы мен «Қазақфильм» киностудиясының ұйымдастыруымен кинорежиссер Сатыбалды Нарымбетовтің «Көзімнің қарасы» атты кітабының тұсаукесері болып өтті.
«Көзімнің қарасы» кітабы тек кино саласында ғана емес, көркем проза жанрында да еңбектеніп келе жатқан Қазақстанның еңбек сіңірген қайраткері, Мемлекеттік сыйлықтың иегері, тәуелсіз «Тарлан» және Француз киноөнер академиясы Жорж және Рита Садуль атындағы жүлдесінің иегері Сатыбалды Нарымбетовтің авторлық әлемін тереңірек аша түсетін туынды. Бұдан бұрын да режиссер-қаламгердің «Тентек» атты кітабы, «Ассалаумағалейкум, Атлантида!» атты повесть, әңгімелер жинағы жарық көрген. Жаңа туындыда жазушының өнер әлемі, әріптестері туралы, қоғам мен руханият жайлы толғамдары, эсселері мен естеліктері және әріптестерінің автор туралы ой-толғамдары қамтылған.
Өнер туралы әсерлі әңгімелер айтылған кешке белгілі қоғам қайраткерлері, шығармашылық зиялы қауым өкілдері, студенттер қатысты. «Сатыбалды Нарымбетов – бұл қазіргі қазақ көркемөнерінің биігін, парасатын, пәлсапасын айқындайтын есімдердің бірі. Өнері әлемге танымал, ресми де, бейресми де мойындалған, өмір ұстанымы, өмір салты, жалпы болмысымен суреткерлік табиғаттың маңызын, мәнісін аша түсетін тұлға», дейді кітаптың алғысөзін жазған белгілі сыншы, мәдениеттанушы, Қазақстанның еңбек сіңірген қайраткері Әлия Бөпежанова.
Айгүл АХАНБАЙҚЫЗЫ,
«Егемен Қазақстан»
АЛМАТЫ