Айбергенов әлемі

Төлеген Айбергенов бейнесі де өзінің поэзиясы сияқты сартап сағынышқа айналып, ғасыр қойнауына сіңіп барады. Күні кеше ортаңда болғандай, "Сұңқар төсі томпиып қарсы қарап" тұрғандай сезілетін, қазақ поэзиясындағы сағыныш өлшемін жеке-дара жүгіндіріп қойған ақынды бар-жоғы 30 жыл дер басыпты дегенге өзіңді де, өзгені де сендіріп көр... Биыл ақынның туғанына – 80 жыл. Осыған орай Қазақстан Жазушылар одағында «Төлеген Айбергенов поэзиясы және қазіргі заман» атты халықаралық ғылыми-теориялық конференция өтті. Түркия, Қытай, Өзбекстан, Қырғызстан мемлекеттерінен, Қазақстанның әр түкпірінен келген өкілдер мен қо­нақ­тардың қатысуымен өткен кештің шы­мыл­ды­ғы «Айбергенов әлемі» атты деректі фильмнің тұсау­ке­серімен ашылды. Ақын, Халықаралық «Алаш» әдеби сый­лығының иегері Әділғазы Қайырбеков моде­ра­торлық еткен конференцияда ең таңдаулы деген жеті баян­дама жасалды. Бұлай дейтініміз, кон­ференцияға ат­са­лысқан көршілес елдер мен Қа­зақстанның әр об­лысынан 70-ке жуық баяндама келіп түсіпті. Бұл – қазақ деген халықтың ақын мұрасына деген қызығушылығының, құрметінің көрінісі болса керек. Конференцияның алғы сөзін ақын, Қазақстан Жазушылар одағы басқарма төрағасының бірінші орын­басары Ғалым Жайлыбай айтты. Филология ғы­лымдарының докторы, про­фессор, Мемлекеттік сый­лық­тың иегері Мекемтас Мыр­зах­метов, «Қазақ елі» журна­лы­ның Қырғызстандағы тіл­шісі, филоло­гия ғылымдарының док­­торы Оғыз Доған, ақын Свет­­қали Нұржан, М.Әуезов атын­дағы Әдебиет және өнер инс­­титуты, театр және кино бө­лімінің меңгерушісі Аман­гелді Мұқан, филология ғылым­да­рының кандидаты, доцент Сал­танат Айбергенова, ақын Мақ­­сат Әлсейітов, ТарМПИ «Бауыр­жантану» ҒЗО ғылыми қызметкері Әлімбай Найзабаев ақын шы­­ғармашылығының әр қырына тоқталып, баяндама жасады. Халықаралық жиынның қоры­тындысында ел Үкіметіне Шым­кент қаласындағы Т.Айбер­генов кө­ше­сіне ескерткіш орнату; Білім және ғылым министрлігіне ОҚМПИ жанынан «Төлегентану» ғылыми-зерттеу орталығын ашу; Қазақстан Жазушылар одағына Төлеген Айбергеновтің толық шығармалар жинағын басып шығаруды ұйымдастыру; Алматы қаласы әкім­дігіне Бұхар жырау көшесіндегі №81 мектепке Т.Айбергенов атын беру; Алматы қаласындағы Марков көшесін Т.Айбергенов атына ауыстыру жайын­да ұсыныс жолдау туралы қарар қабылданды. Аталмыш конференция Тө­леген Айбергеновтің 80 жыл­­дығы қарсаңында атқарылар ша­ра­лардың басы ғана екенін айта кеткен жөн. Алмас НҮСІП, «Егемен Қазақстан» АЛМАТЫ