Кеше Қазақстан Республикасы Орталық сайлау комиссиясының мүшесі Марат Сәрсембаев мәслихаттардың шығып қалған депутаттарының орнына кандидаттарды тіркеу қорытындылары және олардың сайлауалды науқанды жүргізуі туралы брифинг өткізді.
Орталық сайлау комиссиясы мүшесінің хабардар етуінше, мәслихаттардың шығып қалған депутаттарының орнына сайлау науқаны шеңберінде еліміз бойынша сайлау өтетін 58 сайлау округінде босаған депутаттық мандаттарға барлығы 201 үміткер ұсынылды. Ал округтік сайлау комиссияларының мәслихаттардың шығып қалған депутаттарының орнына кандидаттар ретінде тіркеу кезеңінің қорытындысында бойынша 188 адам тіркелді. Осылайша, қазіргі уақытта мәслихаттардың шығып қалған депутаттарының орнына сайлауда бос бір депутаттық мандатқа орташа бәсекелестік үштен аса үміткерді құрайды.
«Кандидаттардың 62-сі Қазақстан Республикасы саяси партияларының мүшелері, 69-ы партия қатарында жоқтар, 57-сі өзінің партияға тиесілігін көрсетпеген, – деді М.Сәрсембаев. – Қазіргі кезде тіркелген кандидаттардың сайлауалды үгіт науқаны жүріп жатыр. Сайлау заңнамасына сәйкес, сайлауалды үгітті жүргізу үшін барлық кандидаттарға тең жағдайларға кепiлдiк беріледi. Атап айтқанда, мемлекет кандидаттарға теледидардан 15 минут сөз сөйлеуiне, радиодан 10 минут сөз сөйлеуіне, сондай-ақ, баспа басылымдарында 0,1 баспа табақтан аспайтын көлемде екi мақала жариялауына кепілдік береді».
ОСК мүшесінің атап өткеніндей, жергiлiктi атқарушы органдар тиiстi сайлау комиссияларымен бiрлесiп барлық кандидаттар үшiн үгіттiк баспа материалдарын орналастыру үшiн орын белгiлейдi және оларды стендтермен, тақталармен, тұғырлықтармен жарақтандырады. Үгiттiк баспа материалдары барлық кандидаттар үшiн тең құқықтар қамтамасыз ететiн жағдайда орналастырылады. Тіркелген әрбір кандидат сайлауалды үгіт жүргізу үшін кандидаттың жеке қаражатынан (2 445 900 теңгеден аспайтын), кандидатты ұсынған қоғамдық бiрлестiк бөлген қаражаттан (4 891 800 теңгеден аспайтын) және ел азаматтары мен ұйымдарының ерiктi қайырмалдықтарынан (7 337 700 теңгеден аспайтын) тұратын өзінің сайлау қорын құра алады. Мәслихаттың депутаттығына кандидаттың сайлау қорындағы ақшалай қаражаттың шекті мөлшері 14 675 400 теңгеден аспауы тиіс.
БАҚ шарт негізінде тіркелген кандидаттарға эфир уақытын және баспасөз бетінен орын береді. Бұл ретте шарт талаптары белгiлi бiр кандидатқа артықшылық туғызбауға тиiс, – деді М.Сәрсембаев әрі қарай. – Сайлау қорын құрмайтын азаматтар қаржыландыруды қажет етпейтін сайлауалды үгіт жүргізуге құқылы. Сайлау күні және оның алдындағы күні БАҚ-та үгіт материалдарын жариялауға жол берілмейдi. Ал үгіт науқаны 2017 жылғы 24 наурыз күнгі сағат 24.00-ге дейін жалғасады».
* * *
Кеше, сондай-ақ, Орталық сайлау комиссиясының отырысы өтті. Онда «Нұр Отан» партиясының мүшесі Альберт Павлович Рауды Қазақстан Республикасы Парламенті Мәжілісінің депутаты етіп тіркеу туралы шешім қабылданды.
Шешім «Қазақстан Республикасындағы сайлау туралы» Қазақстан Республикасының 1995 жылғы 28 қыркүйектегі Конституциялық заңының 46, 97-1 және 98-баптарына сәйкес, «Нұр Отан» партиясы Саяси кеңесі бюросының қаулысы негізінде қабылданып отыр. Альберт Рауға Орталық сайлау комиссиясының төрағасы Берік Имашев Парламент Мәжілісі депутатының куәлігі мен омырауға тағатын белгіні тапсырды.
Әлисұлтан ҚҰЛАНБАЙ,
«Егемен Қазақстан»