Бірі жеңіп, екіншісі есе жіберді

Жоғары хоккей лигасындағы плей-офф сынының 1/4 финалына шыққан қазақстандық қос клуб – Қарағандының «Сарыарқасы» мен Өскеменнің «Торпедосы» алғашқы ойындарын өткізді. Қарағандыда өткен матчта «Сарыарқа» Ресейдің «За­уралье» командасымен кездесіп, 3:1 есебі­мен басым түсті. Қос команданың арасындағы матч қаншалықты тартысты өрбі­ген­мен, есеп тек алғашқы кезеңнің соңғы минутында ғана ашылды. Бұл шайбаны «Сарыарқа» сапынан Олег Ломако өз еншісіне жазды. Кез­десудің екінші кезеңі басталар тұста Виталий Смолья­нинов қонақтарды тағы бір мәрте қапы қалдырды. Матчтың соңғы бөлігінде жан­­күйерлер екі голдың куәсі болды. Алдымен, 52-минутта Артур Сарваров басымдықты арт­тырған болса, негізгі уақыт­тың аяқталуына үш минут қалғанда «Зауралье» ойыншысы Евгений Сулимов жалғыз голдың авторы атанды. Қос ұжымның арасындағы теке-тіресте «Сарыарқа» осылайша алға шықты. Дәл осы сында өнер көрсеткен Өскеменнің «Торпедосы» өз айдынында Санкт-Петербургтің «Динамосымен» күш сынасып, 2:3 есебімен есе жіберіп қойды. Кездесудегі алғашқы гол 11-ми­нутта соғылды. Тал­­ғат Жай­лауов­­тың нә­тижелі соқ­қысынан кейін шығыс­қазақ­стандықтар есепте алға шыққан. Алайда, ара­ға екі минут салып Артур Чу­ви­ляев таразы басын теңестіріп кетті. Матчтың келесі кезеңінде бір ғана шайба соғылды. Бұл тұста «Торпедо» сапынан Майк Дал­­хёй­сен мергендігімен танылды. Ойынның соңғы бөлігі жерлес­теріміз үшін ойдағыдай аяқтала қоймады. Себебі, төрешінің ыс­қы­рығы естіле салысымен алға ұм­­тылған питер­ліктер есепті 2:2-ге жет­­кізсе, араға үш минут салып жеңіс го­лын салды. Бұл шайбалар, сәй­кесінше Сергей Кузнецов пен Вадим Щегольковтың есебіне жазылды. Аян ӘБДУӘЛИ, «Егемен Қазақстан»