Головкин келесі жекпе-жегін Қазақстанда өткізетінін айтты

Орта салмақта WBA (Super), IBO, WBC және IBF белбеулерінің иегері Геннадий Головкин (36-0, 33 КО) келесі жекпе-жегін Қазақстанда өткізетінін мәлімдеді. «Расымен, ендігі айқасымды өз елімде өткізсем деймін. Себебі, ол жақта да кәсіпқой боксты көз алдарында көргісі келеді. АҚШ-та бұл жоғары класс болып есептелсе, Қазақстан да осыған қосылуға ниетті. Боксты көргісі келетіндер көп», – деді Головкин соңғы баспасөз жиынында. Осыған дейін GGG-дің EXPO-2017 көрмесі кезінде ұйымдастырылатын бокс кешінде шаршы алаңға шығатыны хабарланған. Кейбір ақпарат көздері тіпті, оның 10 маусымда өтетінін, ал оның қарсыласы орта салмақтағы WBO белбеуінің иегері Билли Джо Сондерс (24-0, 12 КО) болатынын жазған. Британ боксшысы Головкиннің осы сенбіде болар жекпе-жегіне арнайы қатысады деп күтілуде. Қос боксшының Астанадағы көрмеде жекпе-жекке шығу жөнінде келіссөздер жүргізгенмен, нақты шешімге келмегені хабарланған. Сонымен қатар, Сондерс өзінің міндетті қарсыласы грузиялық Автандила Хурцидземен (32-2-2, 21 КО) жұдырықтаспау жөнінде ортақ ымыраға келген болатын. Айта кетейік, Головкин 18 наурызда Нью-Йорктегі Madison Square Garden аренасында WBA (Regular) белбеуінің иегері америкалық Дэниел Джейкобспен күш сынасады. Бұл кешті елімізде «Қазақстан» және «KazSport» телеарналары 19 наурызда 08:00-де тікелей эфирде көрсетеді.