Әуе тасымалы заңдық сипат алды

Кеше Сенат Төрағасы Қасым-Жомарт Тоқаевтың жетекшілігімен өткен палатаның кезекті жалпы отырысында Ауған­стан Ислам Республикасының тұрақтылығын қамтамасыз ету­ге қатысты жалғыз мәселе қаралды. Заң жобасының толық атауы «Қазақстан Республикасының Үкі­меті мен Америка Құрама Штат­та­рының Үкіметі арасындағы Ауғанстан Ислам Респуб­ли­ка­сы­ның қауіпсіздігін, тұрақтылығын және оны қайта қалпына келтіруді қамтамасыз ету жөніндегі іс-қимылға Америка Құрама Штат­тарының қатысуына байланысты Қазақстан Республикасының аума­ғы арқылы өтетін жүк пен пер­соналдың әуе транзиті туралы келісімді ратификациялау туралы» деп аталады. Аталған заңдық құжат бой­ынша баяндаманы Сыртқы істер министрінің орынбасары Қайрат Омаров жасады. Оның мәлі­ме­ті­не қарағанда, бүгінге дейін еліміз аумағы арқылы 10 мыңға жуық транзиттік рейс жасалған. Келісім бекіген жағдайда бұған дейін қол қойылған өзара түсіністік туралы меморандум күшін жоя­тын болады. Сондай-ақ құжат Ауғанстандағы тұрақтылықты қам­тамасыз етуге және Орталық Азиядағы қауіпсіздікті орнатуға ықпал ететіні ерекше атап өтілді. Министр сөз соңында Ауған­стан­дағы коалициялық күштерге қол­дау көрсету ұлттық қауіпсіздікке сәйкес келерін назарға салды. Қосымша баяндама жасаған Халықаралық қатынастар, қорға­ныс және қауіпсіздік комитетінің төрағасы Қуаныш Сұлтанов еліміз бұл мәселеге үлкен мән беріп отырғандығымен бөлісті. Сенатор еліміздің мойнына алған міндеттемелерін нақты істермен дә­лел­деуі абыройы мен беделін көте­руге ықпал ететін болады дегенді баса айтып өтті. Заң жо­басы депутаттар тарапынан бір­ауыздан қолдау тауып, қабыл­данды. Асқар ТҰРАПБАЙҰЛЫ.