Тарбағатай тұрғындары оралға қолдау көрсетуде

Батыс Қазақстан облысы топан судың астында қалып, төтенше жағдайға тап болып отыр. Апаттан мыңдаған адамдар зардап шегуде. Осыған орай, кеше Тарбағатай ауданының Көкжыра ауылында өңір жұртшылығы тасқыннан зардап шеккен батысқазақстандық тұрғындарды қолдауға арналған акция өткізді. – Біз, Тарбағатай ауданының жұртшы­лы­ғы, былтырғы қолайсыз көктем мезгілінде тасқынның зардабын көріп, бейнетін шеккен халықпыз, – деді Тарбағатай ау­да­ны әкімінің орынбасары Сіләмбек Әзім­ханов. – Бүгін біз Батыс Қазақстан облы­сы­ның бірқатар елді мекендерінде су тас­қынынан зардап шеккен ағайынды қолдау жөнінде арнайы акция ұйымдастырып отырмыз. Былтырғы көктемдегі қиын-қыстау кезде Тарбағатай ауданына Елбасы, Үкімет және бүкіл қазақстандықтар қолынан келген кө­ме­гін аяған жоқ. Осы өңірдің тумалары, осы өлкеде түрлі іссапарлармен болып, суын ішіп, ауасын жұтқан, ел-жұрттың сый-сыя­патын көрген зиялы азаматтар қиын сәтті басынан өткеріп отырған тар­бағатайлық­тарға барынша көмек көрсеткен-ді. Сіләмбек Шәріпханұлының айтуынша, аталмыш қолдау акциясын өткізу бастама­сын барша аудан жұртшылығы, сонымен қа­тар қоғамдық ұйым өкілдері және кәсіп­кер­лер көтеріпті. Бұл азаматтардың бүгінгі ниеті – Батыс Қазақстан жұртшылығын ба­рын­ша демеп, қаржылай қолдау білдіру. Осы күні ау­дан­дағы барлық мекемелер мен ұжым­дар­дың, кәсіпорындардың жұмысшы­лары, мектептер мен ауруханалар қызмкет­кер­лері батыс­қазақ­стандық ағайындарды қол­дау жө­ніндегі қорға біркүндік жалақы­сын аударды. Жиында сөз сөйлеген аудандық ардагерлер кеңесінің төрағасы Мұқан Сахариев батыс­қазақ­стандықтардың басына түскен ауыртп­алық бүкіл қазақ жұртының, оның ішінде Тар­бағатай халқының да басына түс­кен ауырт­палық деп есеп­тейді. Халқы­ның қамын ойлай­тын Елба­сымыз тұрғанда, да­мы­ған мемлекетіміз тұрған­да сіздер жүде­ме­ңіздер! Бүкіл Қазақ­стан халқын зардап шеккен жұртқа көмек беру қорына біркүндік ең­бекақыларын аударуға шақырамын, деген ақ­сақал жұртшылықты береке-бірлікке үндеді. Біз Батыс Қазақстандағы ағайынның қа­­зіргі жағдайын жақсы түсінеміз, жүре­гі­міз­бен сезінеміз! Бүкіл кәсіпкерлерді, жү­регі жомарт, жаны жайсаң азаматтарды осындай қайырым­ды­лық жасауға шақы­ра­мын, деді «Тарбағатай кә­сіпкерлері» қо­ғам­дық бірлес­тігі­нің жетекшісі Манат Әлім­жанова. Кәсіп­кер әйел бастаған аудан биз­несмендері тас­қын бейнетін тартқан отан­дастарымызға 5 миллион теңге қаржы жіберіп отыр. Көкжыра дәрігерлік амбулаториясының бас дәрігері Жәміш Биғазина да өзі бас­қарып отырған емхана қызметкерлерінің біркүндік жалақыларын батысқазақстан­дықтарға ауда­рып отырғанын айтып, барша Қазақстан дәрі­герлерін осы іске атсалысуға үндеді. Көк­жыра ауылының тұрғыны, еңбек ардагері Совет Ысқақов, М.Әуезов атын­дағы орта мек­теп директорының орынба­сары Әнуар­бек Демеубаев табиғат апатына ұшырап отырған батысқазақстандық жұртты сабырға шақы­рып, қолдау білдірді, көкжыралық ақын  Дулат Шідеров мына өлең жолдарын арнады:   Жатсақ та шалғай Шығыста, Сәлемім жетсін туысқа! Ұрпағы едік қайсар қазақтың Сынбаған сан мың ұрыста! Алладан келген бір сынақ, Еңсеңді, халқым, тік ұста! Тәуелсіз, тыныш іргеміз, Жасыма, біздей ұл мен қыз! Қамықпа, қайсар ата-ана Біз Сіздермен біргеміз! Оңдасын ЕЛУБАЙ. Ержан ӘБІШ, журналист.