Қалашық аумағында ұйымдастырылған басқосуда «Астана ЭКСПО-2017» ҰК» АҚ Коммерциялық департаментінің директоры Дәулет Еркімбаев жарты әлем көз тіккен шараға дайындық жұмыстарын әңгімеледі. Ол алдымен басталуына жетпісшақты күн қалған көрменің билеттерін тұрғындардың сатып алуына барлық жағдай жасалып жатқанын жеткізді. Ал кешеге дейін көрменің 670 мыңнан астам билеті иесін тапты. Оның 13 пайызы шетелдіктердің еншісінде.
«Наурыз айында Қазақстанның барлық өңірінде, нақтырақ айтсам, облыс орталықтарында билет сататын кассаларды аштық. Өткен жылдың 10 желтоқсанында Астана мен Алматы қалаларында кассалар өз жұмысын бастады. Осы жылдың 8 наурызында төрт өңірде билет сататын орталық ашылды. Кейін, 20 наурызға дейін бес облыста және 25 наурыздан бастап бес өңірде билет сататын кассалар тұрғындарға қызмет ете бастады», деді Д.Еркімбаев.
Коммерциялық департамент директорының сөзіне сенсек, билет мәселесіне қатысты қиындықтар туындамайды. «Халықаралық шараның билеттері еліміздің 16 өңірінде де сатылуда. 6 наурыз күні «MEGA Silkway» сауда ойын-сауық орталығында тағы бір касса ашылды. Қазіргі таңда біздің билеттер 15 нүктеде және «Қазпошта» компаниясының мыңнан астам бөлімінде сатылуда. Осы аптадан бастап ЭКСПО-2017 көрмесінің билеттері темір жол билеттерімен бірге еліміздің барлық облысындағы 220 кассада сатылады», деді департамент басшысы.
ЭКСПО-2017 халықаралық көрмесінің билеттері Ресейдің 7 қаласында сатыла бастаған. Билет құны – 850-1650 рубль шамасында. Дәулет Еркімбаевтың мәліметінше, Мәскеу, Санкт-Петербург, Сочи, Қазан, Новосібір, Нижний Новгород және Екатеринбург қалаларында ЭКСПО көрмесінің билеттерін сататын 45 орын бар. «Мұнымен жұмыс тоқтап қалмайды. Біз билет сату аймағын кеңейте береміз», дейді ол.
Департамент директоры халықаралық көрменің ең қымбат билеті 8 мың теңге тұратынын атап өтті. Сондай-ақ, бағасы 20 мың теңге болатын лимиттелген естелік билеттер бар. Оны алған азамат көрмеге кез келген күні кіре алады. Сондай-ақ, билетте тағы басқа жеңілдіктер қарастырылған. «Алайда, лимиттелген билеттер Ресей Федерациясы аумағында сатылмайды, тек Қазақстанда ғана ұсынылады. Өйткені, ол шектеулі көлемде ғана басылған. Жеңілдіктер де тек еліміздің ішінде сатылған билеттерде қарастырылады», деді Д.Еркімбаев. «Астана ЭКСПО-2017» ҰК» АҚ өкілі сөзінің соңында бұл бағытта Қытайдың ірі туристік компанияларымен жұмыс жасалып жатқандығына тоқталды.
ЭКСПО-2017 көрмесі билеттерінің бағасы жұмыс күндеріне – 4000 теңгеге, демалыс күндеріне 6000 теңгеге сатылуда. Белгілі датасы қойылмаған билеттер құны алғашқыларымен салыстырғанда, 2000 теңгеге қымбат.
Асхат РАЙҚҰЛ, «Егемен Қазақстан»
