50 миллиард доллар қаржы бөлді

Жапония үкіметі ағымдағы қаржы жылының бюд­жетін толықтыру жөнінде шешім қабылдады. Осы елдің «Киодо» агенттігінің хабарлауынша, Жапония үкіметі наурыздағы зілзала мен оның салдарынан болған апаттардың зардаптарын жоюға 4,02 триллион иен (50 миллиард долларға жуық) бөлді. Агенттіктің атап өтуінше, 11 наурыздағы 8,9 баллдық жойқын зілзала Жапония экономикасына екінші дүние­жүзілік соғыстан кейінгі аса зор көлемде шығын келтіріп отыр. Ал 1995 жылы Хонсю аралында болған қуатты зілзала зардаптарын жою үшін бұл ел 3,23 триллион иен бөлген еді. Жапония қаржы министрлігінің мәлімдеуінше, мемлекет қосымша құнды қағаздар шығармай-ақ, зардап шеккен аймақтарды қайта қалпына келтіре алады. ЖАРЫЛЫСТАН 16 АДАМ ОПАТ БОЛДЫ Пәкстанның Карачи қаласындағы құ­мар ойын притонының бірінде болған жарылыстан 16 адам мерт бо­лып, 40-қа жуық адам жарақат ал­ған. Бұл туралы «Франс пресс» агенттігі қалалық поли­цияның мәліметтеріне сілтеме жасау ар­қылы хабарлады. Пакет ішіндегі қолдан жасалған бомба бейсенбі күні кешкісін жарылған. Жарылыс кезінде ғимарат та айтар­лық­тай бүлінген көрінеді. Жергілікті полицияның мәлімет­тері­не қарағанда, бұл Румми клубындағы құмар ойыны заңсыз жұмыс істеп келген. Ал мекеменің өзі жергілікті қыл­мыстық топтардың меншігінде болса керек. Құқық қор­ғау органдары жарылыстың жасалуы қылмыстық топ­тар­дың өзара есеп айырысуларынан болған деген болжам айтуда. ОҚИҒА СЕБЕП-САЛДАРЫ ТЕКСЕРІЛУДЕ «Вашингтон пост» басылымының хабар­лауын­ша, АҚШ-тың федералды азаматтық авиация бас­қармасы елдің бірінші ханымы мен вице-президент ұшақтары­ның әуе кеңістігінде ұшуы кезінде оларға авиадиспетчерлер бақылауды күшейту туралы шешім қабылдады. Азаматтық авиация басқармасының осындай шешім қабылдауына АҚШ президенті Барак Обаманың зайыбы Мишель ханымның ұшағы әскери көлік ұшағымен соқтығысып қала жаздағаны себеп болып отыр. Бұл оқиға 18 сәуірде болған. Авиадиспетчерлердің қателігінен болса керек, әуе кеңістігінде АҚШ-тың бірінші ханымының Боинг-737 ұшағы мен С-17 әскери-көлік ұшағының есепті ара қа­шықтығы тым жақындап кеткен. Қазір осы оқыс оқиғаның себеп-салдары тексеріліп жатыр. Бұған дейін авиадиспетчерлер АҚШ президентінің ұшағы әуеге көтерілген кезде ғана бақылауды күшейтілген режімде жүзеге асырып келген екен. ОН ЖЕТІ ЖЫЛДАН СОҢ АҚТАЛДЫ Ирактың бұрынғы вице-премьері Тарик Азизді осы елдің Жоғарғы соты ақтау туралы үкім шығарды. 2009 жыл­дың наурызында сот оны өлім жа­засына кескен болатын. «Франс пресс» агенттігінің ақпарат­та­ры­на қарағанда, 1994 жылы Ирактың экс-пре­зиденті Саддам Хусейннің жақтастары ретінде Тарик Азиз­бен бірге, барлау қызметінің бұрынғы қызметкерлері Ха­ди Хасуни, Абдул Хасан әл-Маджид және Фарук Хиджазиге Ирак­тың ежелгі тайпасының ұрпағы Бану Тамимді өл­тірді деген айып тағылған еді. Ал кезінде аты-жөндері атал­ған бұл үшеуі өлім жазасына кесіліп, үкім орындалған болатын. МЭРИЯНЫҢ ҒИМАРАТЫН БАСЫП АЛДЫ Қырғызстанның батысындағы Майлысу қала­лық мэриясының ғимаратын 50-ден астам адам ба­сып алды. Бұл ақпаратты «АКИпресс» агенттігі таратты. Аталған агенттіктің хабарлауынша, басып алғандар қала­ның бұрынғы басшысы, қызметінен жақында босатылған Тұр­ғыналы Ариповтің жақтастары. Милиция қалалық мэрия­ның ғимаратын басып алғандығы жөніндегі ақпаратты жоққа шы­ғарып отыр. Дегенмен, жергілікті әкімдік агенттікке 22 сәуірде қала мэриясын Т.Ариповтің жақтастары шынында да басып алғандығын хабарлаған. Ал олар қала басшысы Рысбек Ыза­бе­ков­тің қызмет бөлмесіне кіріп алып, одан облыс губер­нато­ры­мен, Премьер-министр Алмаз Атамбаевпен кездестіруді талап еткен. Сондай-ақ Р.Ызабековті бөлмесінен күштеп шы­ғарып, оның орнына өз жақтастары Т.Ариповті отырғызған. УКРАИНАНЫҢ КЕДЕН ОДАҒЫНА КІРГІСІ ЖОҚ ИТАР-ТАСС агенттігінің хабар­лау­ын­ша, Украина Кеден одағына кірмейді. Бұл туралы 22 сәуірде елдің сырт­қы істер министрі Константин Грищенко парламентте депутаттардың сұрақ­та­рына жауап беруі кезінде мәлімдеген. Министрдің пікірінше, Украина Кеден одағымен өзара іс-қимыл жасауы ықти­мал. Ресей Украи­наның Кеден одағына мүшелікке кіру жағ­дайын қойып отырған жоқ. Бұл мәселе екі елдің премьер-министрлері Н.Азаров пен В.Путиннің кездесуінде де қозғал­ған. Бұған Еурокомиссияның басшысы Ж.М.Баррозудың 18 сәу­ірде Украинаға келген сапарында елдің бір уақытта екі одақ­пен интеграциялануы мүмкін емес, дегені әсер етсе керек. ҚЫСҚА ҚАЙЫРЫП АЙТҚАНДА: Мексиканың солтүстігіндегі Тамаулипас штатында бір жерде жерленген адамдардың мүрделері тағы да табылды. Бүгінде олардың жалпы саны 177-ге жетті. Венгрияның №1 телеарнасы интернетке Адольф Гитлерді туған күнімен құттықтаған роликті орналастырды. Онда Гитлерді «неміс саясаткері» деп атаған. Францияның Нант қаласында алты адамнан тұратын отбасы ұшты-күйлі жоғалған. Полиция оларды ұрлаған, одан кейін өлтірген деген жорамал жасап отыр. Ливия жаңалықтар агенттігінің хабарлауынша, НАТО күштері Ливияның мұнай танкерін басып алған. Танкерде мұнай бар, не жоқ екендігі қазірге белгісіз. Интернет материалдары негізінде әзірленді.