Даңқты боксшыны еске алды

Бұрнағы күні Алматы қа­ласындағы Қазақ спорт және туризм академиясы ғимаратында Қазақстанның еңбек сіңірген жат­тық­тырушысы, даңқты боксшы Әбдісалан Нұрмахановты еске алу шарасы болып өтті. Спортсүйер қауым бас қосқан жиылысты ашқан академияның пре­зиденті, профессор Қайрат Зә­кіриянов өз сөзінде көк байр­а­ғымыздың әлемдік додаларда биік желбіреуіне жол ашқан білікті ұстаз, ғалым Ә.Нұрмахановтың есі­мі осы оқу орнының ең жақсы жабдықталған жаттығу залына бе­рілгенін, жыл сайын даңқты боксшы атындағы стипендияны қабілетімен көзге түскен студентке тағайындап отырғандықтарын жеткізді. Сондай-ақ Қазақстан Ұлт­тық ғылым академиясының президенті, академик М.Жұры­нов, Алматы қа­ла­лық бокс федерациясының президенті, Қажымұқан Мұңайтпа­с­ұлы атындағы спорт мектебінің директоры А.Тшан, Қазақстан­ның ардагер боксшылары федера­ция­сының төрағасы, дәрігер М.Дайырбеков, КСРО және Қазақ­станның еңбек сіңірген жаттық­ты­ру­шысы, АИБА төрешісі Б.Цха­рашвили секілді Әбдісалан Нұрма­хан­овтың замандастары мен тәлі­мін көрген шәкірттері естеліктер айтып, боксшы қазақтың есімін болашақ ұрпақ ұмытпас үшін игі істер атқару жөнінде пікірлерін ортаға салды. Экономика ғылым­дарының докторы Оразалы Сәб­ден боксшының зайыбы Күлпаш Нұрмаханованың иығына қазақ­тың дәстүрімен қамзол жауып, сый-сияпат көрсетті. Қазан айында Алматыда қала­лық және облыстық бокс фе­де­рацияларының ұйымдастыруы­мен Ә.Нұрмаханов атындағы ха­лықаралық турнир өтетін болды. Азия-Африка ойындарының же­ңім­пазы, КСРО халықтары спар­та­киадасының екі дүркін жүлде­гері, КСРО чемпионатының күміс жүлдегері, қазақтың даңқты бокс­шысы Әбдісалан Нұрмаханов тірі болғанда биыл 75 жасқа толар еді. Қанат ЕСКЕНДІР. Алматы.