Қазақстанның бұл елмен арадағы дипломатиялық қарым-қатынасының негізі 1992 жылдың 28 қаңтарында қаланған. 1993 жылы Корея Республикасының Қазақстандағы, ал 1996 жылы Қазақстанның Корея Республикасындағы елшіліктері ашылды. Сол уақыттан бері екі елдің әріптестік әлеуетін арттыратын тетіктер нығая түсті. Оған мемлекеттер басшыларының жоғары деңгейдегі кездесулері де ықпал еткені анық.
Қос тарап арасындағы байланыстың бекуіне сауда-экономикалық ықпалдастықтың қосқан үлесі зор. Мәселен, 2016 жылы Қазақстан мен Оңтүстік Корея арасындағы тауар айналымы 676,7 миллион АҚШ долларын құраған екен. Оның 223,5 миллион АҚШ доллары – экспорттың, 453,1 миллион АҚШ доллары импорттың еншісінде. Өткен жылдың қараша айында Қазақстан Президенті Нұрсұлтан Назарбаевтың Оңтүстік Кореяға мемлекеттік сапары аясында болашақта да сауда саласына айрықша көңіл бөлінетіні, сәйкесінше, тауар айналымының көлемі де артатындығы, бұл ретте, қос мемлекет арасында нақты жобалардың қолға алынғаны айтылған болатын. Брифингте сөйлеген сөзінде Дулат Бақышев те сауда-экономикалық және басқа да салалар бойынша ынтымақтастықты дамытуға үлкен мүмкіндік бар екенін атап өтті.
«Жалпы, 2017 жыл – екіжақты қарым-қатынастың өрістеуі үшін өте маңызды жыл. Себебі, биыл дипломатиялық байланыстың орнағанына 25 жыл толып отыр. Осы уақыт ішінде ауқымды жұмыстар атқарылды. Тараптар арасындағы байланыстың нығаюына еліміздегі корей диаспорасы да үлес қосуда. Бұлардың барлығы біздің дамудың келесі, жаңа кезеңіне аяқ басқанымызды білдіреді. Қазір экономикалық байланыстар белсенді түрде дамып келеді. Бұл бағытта екіжақты жобалар бар. Мәдени-гуманитарлық саладағы әріптестікте де оң динамика байқалады. Осы тұрғыдан келгенде, бізді екі ел президенттерінің, үкімет басшыларының келіссөздері аясында қабылданған құжаттарды іске асыру бойынша ауқымды жұмыстар күтіп тұр», – деді Д. Бақышев.
Елші Сеулдің Астанада өтетін ЭКСПО-2017 халықаралық көрмесіне де айрықша қызығушылық танытып отырғанын жеткізді. «Сеул бұл көрмеге белсенді түрде қатысып, баламалы энергетика саласындағы өзінің жетістіктерін жан-жақты көрсетеді деп ойлаймыз», – деді ол.
Негізінен, Корея Республикасына шығарылатын қазақстандық экспорттың басты тауарлары – уран, таза болат, темір, алтын, мыс болса, ал бізге ол елден келетін импорттық өнімдер – электроника, көліктердің құрал-жабдықтары. Қазақстанда Оңтүстік Корея капиталының қатысуымен 900-ден астам бірлескен кәсіпорын тіркелген. Мәселен, бүгінде елімізде «Samsung C&T», «LG Electronics», «LG Chem», «SK Corporation», «Hyundai», «POSCO» секілді кәсіпорындар мен «Dong Il Highville», «Urim», «Кыкдонг Консоль» сияқты құрылыс фирмалары жұмыс істейді.
Ләйла ЕДІЛҚЫЗЫ,
«Егемен Қазақстан»
