«Көшбасшылық жеке тұлғаға қаратылып айтылатын қасиет болса керек. Бұл ретте Қазақстанның Тұңғыш Президенті Нұрсұлтан Назарбаевтың өмірі баршамызға өнеге болады деп ойлаймын. Елбасының саяси шешімдері көшбасшылық, көсемдік тұлғасын көрсетеді. Бүгінгі білім жарысында жүзден жүйрік, мыңнан мықты шығуларыңызға тілектеспін», деді Қазақстан Республикасы Тұңғыш Президенті – Елбасы кітапханасы директорының орынбасары Жапсарбай Ілиясұлы.
Қазақстан жастары конгресі – жастар мен жастар ұйымдарының мүдделерін қорғау міндетін атқаратын республикалық ұйым. Бүгінде кітапхана мен Қазақстан жастары конгресі жастармен жүйелі жұмыс жүргізу қызметі аясында түрлі жобаларды жүзеге асыруда. Осы сайыс соның бір дәлелі іспеттес.
«Бұл жарыс тек оқушылардың білімін сынаумен шектелмейді. Олардың жан-жақтылығын, тапқырлығын, шешендігін тексереді. Себебі сайыстың аты айтып тұрғандай, көшбасшы болу үшін білімді болу жеткіліксіз. Одан бөлек ұйымдастырушылық, белсенділік қабілеттің де қажет екені мәлім. Қазақстан жастары конгресі – 2001 жылы тікелей Елбасының тапсырмасымен құрылған еліміздегі ең үлкен жастар ұйымы. Осы уақытқа дейін жастардың қабілетін арттыруға, патриоттық сезімін күшейтуге өз үлестерін қосып келеді», деді «Қазақстан жастары конгресі» заңды тұлғалар бірлестігі атқарушы директорының орынбасары Дәулет Ғалымбекұлы.
«Көшбасшы-2017» сайысында 8-10-сынып оқушыларының жалпы пәндер бойынша білімі, көшбасшылық қабілеттері сыналды. Сайыс 4 кезеңнен тұрды. Олар – ойын тренингтері, интеллектуалды сайыс, жұрт алдында сөз сөйлеу – public speech және сұхбат. Сайыс қатысушыларымен сұхбаттасу оқушының өмірлік қағидасы, оқыған кітаптары, ізденістері, және сыни ойлау қабілетін айқындау мақсатында өткізілді.
Сайыс нәтижесі бойынша №70 лицей мектебінің оқушысы Айжан Төлебай жеңімпаз атанды.
Рауан ҚАЙДАР,
«Егемен Қазақстан»
