Дәрігер Добсон медициналық шараларға емес, жедел жәрдем кареталарының орналасуына және зардап шеккендерді дұрыс тасымалдауға назар аудартты. Дәрігерлердің, полиция қызметкерлерінің және оқиға орнындағы дәрігерлердің қауіпсіздігін қамтамасыз ететін және оларға көмектесетін құтқарушылар кооперациясының маңыздылығын атап өтті. Мысал ретінде жақында Лондонда Вестминстер көпірінде орын алған теракті кезінде түсірілген кадрларды пайдаланды.
Ол Қарағандыда осымен екінші рет дәріс оқыды. Облыс орталығына бес жыл бұрын келген. Сол кезде жедел жәрдем орталығында болып, фельдшерлер жұмысында қолданатын жабдықтарды көрген. Оның айтуынша, британдық мамандар заманауи техниканы пайдаланады. Содан бері біздің дәрігерлер де жаңа реаномобильдер алды. Мақажанов атындағы клиника стационарының бас дәрігері Берік Тілеубаевтың айтуынша, енді британдық жабдықтармен арадағы айырмашылық аса байқалмайды. Шетелдік маман қуанышын жасырмады, өйткені зардап шеккендердің өмірін тасымалдау сәтінен бастап қолға алу керек, көп жағдайда пациенттің аман қалуы осыған байланысты болады.
– Біз дәрігер Добсон айтып берген жүйені енгіземіз, – дейді Берік Еркебұланұлы. – Әрине, оны құқық қорғау органдарымен пысықтау керек. Бұл біздің клиникада ғана емес, бүкіл облыста да болады. Кеңестік жылдары далалық жағдайларда медициналық көмек көрсету ережелерінің жиынтығы болған. Бүгінде ол ережелер ескірді. Енді жаңалықтар енгізу керек, осы мақсатта Еуропаның тәжірибесін қабылдаймыз, – дейді бас дәрігер.
Мирас АСАН,
«Егемен Қазақстан»
ҚАРАҒАНДЫ
