Сарапшылар бұл жаңалықты елдің бағыт-бағдарының өркениетті түрде өзгеруі деп бағалауда. Дегенмен, бұл саяси тұрғыда Астана Ресейге арқасын береді дегенді білдірмейді.
Мақалада Мемлекет басшысы Үкіметке латын әліпбиін қолдану бойынша әзірлік жұмыстарын бастауды тапсырды. «Егемен Қазақстан» газетінде Нұрсұлтан Назарбаев ағымдағы жылдың соңына дейін жаңа қазақ әліпбиі мен жазу нормалары жасалатынын, ал 2025 жылға қарай ел толықтай латын әліпбиіне көшетінін мәлімдеді. Мемлекет басшысы кириллица 1940 жылы саяси көзқарастар бойынша енгізілгенін, оған дейін қазақтар араб әліпбиін пайдаланғанын еске салды. Президенттің пайымдауынша, жаңа әліпбиге өту қиындық туғызбауға тиіс, себебі, қазіргі жас буын ағылшын тілін мектеп қабырғасынан бастап оқиды, оларға латын әліпбиін қабылдау қиынға соқпайды.
Ұсынылып отырған жаңашылдық техникалық мамандықтарды ағылшын тілінде оқуды жеңілдетіп, технологиялық жаңару бағдарламасын жүзеге асыруға ықпал етеді, көптеген пәндерді бастауыш сыныптан бастап, Шекспирдің тілінде өтуге мүмкіндік береді. Бүгінгі таңда Түркиядағы, сондай-ақ Батыс Еуропадағы диаспоралар латын әліпбиінің қазақша нұсқасын қолданатынын айта кету керек. Латын әліпбиін енгізу мәселесі Қазақстанда 2007 жылдан бері талқыланып келеді, алайда күні бүгінге дейін оған қатысты шешім шықпаған еді.
Латынды пайдалану арқылы Астана Батыс елдеріне бет бұрады, Түркияға бұрынғыдан да жақындаса түседі. Оған таңғалудың жөні жоқ, себебі, тілі мен мәдениеті жағынан Қазақстан славян әлемінен гөрі түркі әлеміне жақын. Бұл орайда, Кеңес Одағы ыдырағаннан кейінгі аралықта Әзербайжан, Түрікменстан және Өзбекстан сияқты, Қазақстан да өзінің геосаяси басымдықтарына қарай жаңа өркениет көпірлерін салуда.
Тіл мен мәдениет саласына қатысты мұндай өзгерістердің өзіндік бағасы болатыны белгілі. Сарапшылардың пайымдауынша, бұл саладағы мәселелерді шешуде тұрақтылыққа талпыныс басты тетік болуға тиіс.
