Еліміздегі онкологтар алдында тұрған басты мақсат – қатерлі ісік дертіне шалдығушылар санын азайта түсу. Осы мақсатқа жету жолында дәрігерлеріміздің біршама жетістікке қол жеткізгенін айтпай кетуге болмас. Дегенмен, аталған саладағы шешімін таппай келе жатқан мәселелерді шешу жолында өзге елдер мамандарымен тәжірибе алмаса отырып, қатерлі ісік дерттерін, әсіресе бауырдың гепатоцеллюлярлы карциномасын емдеу әдістерін жақсартуда ортақ шешімдер қабылдаудың маңызды екені анық. Қатерлі ісік ошағын радиожиілік абляциясы арқылы емдеу, яғни бауырдағы және өзге де ішкі мүшелердегі қатерлі ісік ошақтарын жансыздандыру арқылы емдеу тәсілі бірқатар шет мемлекетте кеңінен қолданыла бастағанымен, Қазақстан үшін тың емдеу тәсілі болып табылады.
Алматы онкологиялық орталығы шақыртқан ресейлік, украиналық, белоруссиялық жоғары дәрежелі мамандар екі күндік шеберлік сыныбы барысында еліміздің дәрігерлеріне бауыр ісігін отасыз емдеудің аз инвазивті тәсілін үйретті. Көптеген науқастардың дерті соңғы сатысына өтіп кеткенде ғана анықталып жататындығы бармақ тістеткенмен, радиожиілік абляциясы арқылы емдеу тәсілін сондай ауыр науқастар үшін де қолдануға болады, дейді шетелдік мамандар.
«Алматы онкологиялық орталығы» МҚК ШЖҚ бас дәрігері Дамир Дәулетбаевтың айтуынша, аталған шеберлік сыныптарының ерекшелігі – алғаш рет бауыр рагын кешенді емдеу тәсілдері де қарастырылған екен, ал бұрын тек жекелей ем түрлері ғана қарастырылған. «Қазақстанда жыл сайын бауыр рагымен мыңнан астам адам тіркеуге алынып жатады. Бауыр рагының шамамен, 60-90 пайыз жағдайы бауыр циррозы мен вирустық гепатиттің асқынуы салдарынан туындайды, циррозбен ауыратын науқастардың 5 пайызында өрбиді. Бауыр рагына шалдыққан науқастардың шамамен үштен бір бөлігіне ота жасауға болады», деді бас дәрігер.
Ал Ұлы Отан соғысы мүгедектеріне арналған республикалық клиникалық госпитальдың директоры Жеткерген Арзықұлов осы басқосуда жасаған баяндамасында «Қазақстанда біліктілігі шетелдік дәрігерлерден еш кем түспейтін хирургтер баршылық. Тек онкологтер ғана емес, гастроэнтерологтер, инфекционистер, УЗИ мамандары да бірігіп, бауыры ауырып келген науқастан апта сайын анализ алып, бірге бақылап отырса, аурудың ісікке айналып кетпеу мүмкіндігіне ие болар еді. Салдармен күрескеннен гөрі, себеппен күрес әлдеқайда тиімді болатыны рас. Жақсы нәтижеге қол жеткізу үшін науқастарды тексеруден өткізу жүйесін өзгерту керек шығар», деген пікір білдірді.
Шеберлік сыныбына еліміздің әр облысынан арнайы келген гепатолог, хирург, сәулелік диагностика бөлімінің мамандары қатысты.
Мира БАЙБЕК,
«Егемен Қазақстан»
АЛМАТЫ
