Форум жұмысына Дін істері және азаматтық қоғам министрі Нұрлан Ермекбаев, мемлекет және қоғам қайраткерлері, зиялы қауым өкілдері, ғалымдар, дінтанушылар қатысып, сөз сөйледі. Осымен екінші мәрте ұйымдастырылған форум еліміздегі және аймақтағы Ислам дінінің бүгінгі ахуалы мен дамуын ортаға салды. Форум жұмысын ашып, негізгі баяндаманы жасаған ҚМБД-ның төрағасы, Бас мүфти Ержан қажы Малғажыұлы өзінің сөзінде алғашқы форумның 2015 жылы өткізілгенін айта келіп, онда «Қазақстан мұсылмандарының тұғырнамасы», «Бүгінгі мұсылманның бейнесі», «Имам келбеті» және «Дін қызметкерінің этикасы» сияқты 4 құжат қабылданғанын еске салып, олар имамдардың білімі мен тәжірибесін арттыруға үлкен септігін тигізгенін атап өтті.
Одан әрі мүфти-хазірет форумда қабылданатын екі құжат туралы айтып, олардың маңызы мен мазмұнына тоқталды. Бүгіннің озық талабына жауап бере алатын білімді де білікті имамдар тобын қалыптастыру мақсатымен дайындалған бұл құжаттардың атауы: «Үздік зияткер имам» және «Дәстүрлі Ислам – Әбу Ханифа мазһабы». Қазақ ұстанатын Әбу Ханифа мазһабының озық қырларына тоқталған ғасырлар бойы халқымыздың, ата-бабамыздың жан-дүниесімен үйлесіп кеткен оны уағыздау шараларының үзбей жүргізілетіндігін айтты. Сонымен бірге, Бас мүфти өз баяндамасында «Үздік зияткер имам» тұжырымдамасын дін қызметкерлерінің беделі мен білімін арттыру бағытындағы бірегей қадам деп бағалады.
«Қабылданғалы тұрған тұжырымдамада дін қызметкерлерінің, яғни Бас имам, наиб имам, ұстаз, молда, азаншылардың лауазымдық міндеті мен мәртебесі айқындалды. Бұдан былай дін мамандары жоғары лауазымды қызметтерге сатылап тағайындалатын болады. Имамның қызметі тек бес уақыт намазға имамдық етумен шектелмейді. Оның уағыз айту, діни рәсімдерді атқару, мешітке келген әрбір жамағаттың сұрағына жауап беру, рухани іс-шаралар ұйымдастыру секілді жауапкершілігі жоғары көп жұмыстары бар. «Үздік зияткер имам» атты құжаттың басты мақсаты – ХХІ ғасырдың имамдарын заман талабына сай жан-жақты білімді, білікті, зайырлылық принциптерді ұстану жағынан басқа жамағатқа үлгі ету. Сонымен қатар, бұл тұжырымдама еліміздің мұсылмандарын бірлікке, татулыққа шақырып, халықты ұлтымыздың әдет-ғұрыптарын сыйлауға, зайырлылық принциптерді ұстануға, діни экстремизм мен терроризмнің кез келген түріне төзбеушілікке үндейді», – деп атап өтті Бас мүфти.
Сонымен бірге, ол өз сөзінде барлық имамдардың аттестаттаудан өтіп, білімдері жетілдірілетінін де жеткізді. Оның сөзінен қазір 100-ге жуық имамның Египет пен Түркияда білімдерін жетілдіріп жатқаны белгілі болды.
Форум аталған құжаттарды бірауыздан қабылдады және жұмыс қорытындысы бойынша үндеу қабылданды. Онда Елбасы Нұрсұлтан Назарбаев биылғы Жолдауында діни экстремизмді насихаттаудың алдын алу, әсіресе, интернет пен әлеуметтік желіде оның жолын кесу, радикалды көзқарасқа «мүлде төзбеушілікті» қалыптастыру қажеттігін атап өткені жеткізіліп, оны сөзсіз қолдау қажеттігі айтылған. Сонымен қатар, бас бостандығынан айырылған азаматтарды теологиялық тұрғыдан сауаттандыру, өскелең ұрпақты рухани-адамгершілік рухында тәрбиелеу үшін қосымша қадамдар жасау қажеттігі жөнінде тапсырмалар жүктеді.
«Жолдау жүктеген міндеттерді сапалы орындау мақсатында діни экстремизмнің алдын алу, тұлғаларды оңалту және оларға ақпараттық-түсіндіру жұмыстарын жүргізу үшін Қазақстан мұсылмандары діни басқармасы жан-жақты білімді, білікті және мемлекет мүдделерін қорғай алатын, діни мәселелер бойынша терең ғылыми ізденістер жасай алатын имамдар корпусын жетілдіруі қажет деп санаймыз.
Біз, ІІ Республикалық имамдар форумына қатысушылар, Исламның бірлік пен бейбітшіліктің, ғылым мен өркениеттің діні екенін тағы да паш етеміз. Асыл дініміз ғылымды жоққа шығармайды, ол – заманауи ғылымның негізі, іргетасы. Сондықтан Ислам – бүкіл адамзат өркениетінің көшбасшысы. Бүгінгі заманауи өркениет, ғылым қашанда Ислам құндылықтарына қарыздар деп санаймыз», делінген үндеуде.
Форумның екінші бөлігінде шараға қатысқан имамдар үшін семинар ұйымдастырылды.
Жақсыбай САМРАТ,
«Егемен Қазақстан»