Архив директоры, техника ғылымдарының докторы Борис Жапаров жүргізген кездесудің басты ерекшелігі – Елбасы көтерген идеяға шетелдік ғалымдардың көзқарас білдіруі болды. Кибернетика мен жүйелі зерттеулер саласы бойынша Халықаралық озық зерттеулер институтының директоры және директорлар кеңесінің төрағасы канадалық Дж.Ласкер мен Жапониядағы Рицумейкан университетінің құрметті профессоры, экономика ғылымдарының докторы Кей Карасава барша қазақстандықтар алдына қойылып отырған рухани талаптарға байланысты басқосуға арнайы шақырылған Алматы қаласындағы қоғам қайраткерлерімен бірге ой қосып, Қазақстан ғалымдарымен бірлесе атқаратын ортақ жобалар жөнінде әңгімеледі.
Президент архиві директорының орынбасары, тарих ғылымдарының докторы Қайрат Әлімғазинов бағдарламалық мақаланың маңызы туралы арнайы баяндама жасап, ұлттық сана-сезімінің дамуына ықпал ететін негізгі тетіктерді атай отырып, халқымызға рухани азық болатын терең мазмұнын тарата айтты. Қоғамдық сананы жаңғырту жөніндегі идея осы уақытқа дейін жүргізілген реформалардың заңды жалғасы болуымен мәнін байытып, құндылығын арттыра түспек.
Ұлттық ғылым академиясының академигі Әбдіқаппар Әшімов те саяси және халықаралық тұрғыдан көшбасшылыққа ие бүгінгі Қазақстанның жаңа келбеті туралы әңгімеледі.
Электртехника мен компьютер ғылымы саласы бойынша мыңдаған шәкірт тәрбиелеп, әлемнің белгілі университеттерінде дәріс оқып, көптеген ғылыми жобаларға жетекшілік жасаған Е.Ласкер Қазақстанды бұрыннан білетінін, қазба байлығы мол, саяси тұрақты ел ретінде танитынын және Қазақстанға ақпараттандыру жүйесі, математикалық және компьютерлік модельдеу мамандығы бойынша білім алып жатқан магистранттар мен докторанттарға дәріс оқуға арнайы шақырылғанын жеткізді. Елбасы Н.Назарбаевтың жаңа бағдарламалық мақаласы туралы естіп, мазмұнымен танысқаннан кейін Президенттің елде түбегейлі жаңару үдерістерін жүргізуге бағытталған бастамасын қолдайтынын айтты.
Ал жерінде табиғи қазба байлығы жоқтың қасы болып есептелетін, алайда адам еңбегі аса құнды капитал болып саналатын Жапониядан келген құрметті профессор Кей Карасава Қазақстанға алғаш рет 1990-жылдары Экономика министрлігінің шақыруымен келсе, бұл жолы академик Ә.Әшімовтің ұсынысымен студенттер мен ғылыми ізденушілерге арнайы дәріс оқуға келген. Кей Карасава болашағы зор жас мемлекеттің әр жетістігі халық сенімін нығайтып, ертеңге үмітін ұлғайта түссе деген тілегін білдірді.
Айгүл АХАНБАЙҚЫЗЫ,
«Егемен Қазақстан»
АЛМАТЫ
