«Ресей Жинақ банкі» АҚ Еншілес Банкі: Өсім тұрақты, сапа жоғары, келешек жарқын

Бүгінгі өмірді банктерсіз көзге елестету мүмкін еместігі әмбеге аян. Ал енді еліміздің жалпы банк жүйесін соңғы уақыттарда «Ресей Жинақ банкі» акционерлік қоғамы­ның Еншілес Банкінсіз елестету қалай болар екен? Мүмкін емес демей-ақ қоялық. Бірақ қиындау екені айдан анық. Осы пікірді айғақтайтын дәлелдер де жетерлік. «Жинақ банкі» АҚ ЕБ өз өмір­бая­нын бастаған 2006 жылдың аяғы­нан бергі аз жылдар ішінде Қазақстанның қаржы нарығында тұғырын әсте тө­мен­детпей, биік ұстап келеді. Ресейлік қаржы жүйесінің көшбасшысы, соны­мен бірге Орталық және Шығыс Еуро­па­ның ең ірі қаржылық институты са­налатын Ресей Жинақ банкі сол жылы Тексакабанктің 99,99 пайыз ак­циясын  сатып алған болатын. Еншілес Банктің тырнақалды қадамдары­ның құтты болып ілгерілей түсуіне бұл оқиғаның игі ықпалы болмады дей алмас едік. Қадамның құттылығы неден кө­рін­ді десек, 2007 жылы Банк ұлттық және шетел валютасында жүзеге асы­рылатын банктік және басқа опера­ция­ларды жүргізуге лицензия алды. Іле-шала жарғылық капитал 15 есе дерлік ұлғайтылып, 29 млрд. тең­гені (240 млн. доллардан астам) құрады. Міне, нақ осы жағдай «Жинақ банкі» АҚ Еншілес Банкінің жарғылық капитал көлемі бойынша Қазақстан­дағы аса ірі 10 банктің қатарына қосылуына мүмкіндік берген еді. Уақыт ұшқыр. Ізденістер ұтқыр. Соған сай өзгерістер де ғаламат. Бүгін таңдағы «Жинақ банкі» АҚ ЕБ дегенде көз алдымызға әмбебап банк келеді. Ол дәстүрлі сапаны, тұрақ­ты­лықты жә­не заманауи тех­но­логия­лар­ды оң­тай­лы ұштастыр­ған. Әлем­нің аса ірі банктерімен байланысы да ауқымды, сондай-ақ экономиканың әралуан сала­сын қам­тыған клиентермен және әріп­тес­термен жұмыс тәжі­рибесі де зор. Ресейліктердің қатысуымен қаз ба­сып өркендеген осынау қазақстан­дық Еншілес Банктің қаржы нарығындағы бес жылы үлкен бір белеспен тең. Ол әсіресе кәсіпкерлерді қолдайтын «Даму» қоры, «Бизнестің жол картасы – 2020» мемлекеттік бағдарламаларына бел­­сене, бел шеше қатысуымен қуан­дыр­ды. «Ресей Жинақ банкі» АҚ ЕБ бас­қар­ма төрағасы Олег Смирновтың ай­туын­ша, тек 2010 жылы ғана Банк Қа­зақ­стан экономикасының нақты сек­торына 218 млрд. 475 млн. теңге, ал барлығы 419 млрд. 870 млн. теңге инвестиция салған. Бұл мысалдан да банк әлеуеті байқал­ғандай. Қаржылық көрсеткіштер Банктің Қа­зақ­стан нарығындағы тұғыры тұрақ­ты түрде нығайып, қызмет тиімділігі арта түскендігін айғақтауда. О.Смирнов жа­қында өздерінде акционерлердің жыл­­дық жалпы жиналысы өтіп, онда 2010 жыл қорытындылары шығарыл­ғанын жә­не биылғы жылдың бірінші тоқса­ны­ның нәтижелері талқыланғанын  айта­ды. Өткен жыл банк үшін сәтті бол­ған көрінеді. Біріншіден, елдің макро­эконо­ми­ка­лық көрсеткіші – ІЖӨ 7 пайыз шамасында өскен. Осы елеулі өсім банк жүйесінің қаржылық тұрақ­тылығына әсер еткен. «Ең бастысы, біз Қазақ­стан­ның аса ірі банктерінің он­дығына кіріп, активтер көлемі жөнінен тоғызыншы шепте тұрмыз» деп атап көрсетті төраға. 1 сәуірде банк үлесі шамамен 2,5 пайыз болады деп күтілуде. 2010 жылдың нәтижелеріне келер болсақ, бұл үлес 1,9 пайыздан 2,3 па­йызға дейін ұлғайған. Жалпы өткен жылдың банк жүйесі үшін күрделі болғанына қарамастан, Жи­нақ банкі активтер көлемі жөнінен 27 пайыздан астам өсіп, 282,7 млрд. тең­гені құраған. Заңды тұлғалардың салым­дары 40 пайыздан астам өсіп, 161,7 млрд. тең­геге жеткен. Несиелік портфель өсімі 83 пайыздан асып түсіп, 176,6 млрд. теңге болған. Банк осы орай­да белсенді опера­ция­ларды да­мыту нарығындағы көш­бас­шылар­дың бірі болып табылады. Жалпы алғанда, 2011 жыл­дың 1 қаңтарындағы жағдай бо­йынша меншік капиталы 39,9 млрд. теңгені құрап, банктің таза пай­дасы 2,6 млрд. теңге болды. Алғашқы тоқсан нәтижелері де кө­ңіл­ге тоқ. Айталық, Еншілес Банк активтері 20,3 пайыз өсіп, 340 млрд. тең­гені құрады. Заңды тұлғалардың салым­дары 40,8 пайыз өсіп, 227,7 млрд. тең­ге­ге жетті. Жеке тұлғалардың салымдары 8,3 пайыз өсіп, 36,7 млрд. теңгені құра­ды. Меншік капиталы 42,3 млрд. теңгеге кө­теріліп, таза кіріс 1,8 млрд. теңге тү­рін­де көрініс тапты. Осылайша Банк көш­бас­шылар үштігіне кіріп отыр. Ал, 10 млрд. теңге сомасындағы тіркелген облигациялар 1 мамырдан бастап Банк капи­талын 50 млрд. теңгеге дейін арттырмақ. Әлбетте, О.Смирнов осынау сандық көрсеткіштердің астарында банктің ауқымды ішкі жұмыстары жатқандығын баса айтты. Олай болса, 2011 жыл банк ішіндегі елеулі өзгерістер жылы болмақ. Төрағаның айтуынша, мұның өзі өнер­кә­сіптік революция ретінде айқын­да­лып­ты. Биыл көптеген технологиялық өз­герістер іске қосылмақ. Олардың мақ­саты – банкті клиентке қарай барынша бағдарлау. Клиенттер үшін сатылым көлемін ұлғайту мақсатында жыл аяғына дейін CRM жүйесін өнеркәсіптік тұрғыдан игеру жолға қойылмақ. Банк неғұрлым икемді бола түспек. Демек, 2011 жыл еншілестер үшін сапаны жақсарту жылы болары еш күмәнсіз. Мысалы, банкте енгізілген «Құпия сатып алушы» жүйесі бөлімшелердегі жұмыс сапасын арттыруға қызмет етеді. Ал екінші жартыжылдықта «Несие фабрикасы» деп аталатын үлкен жоба басталмақ. Бұл үдеріс несие беру рәсім­де­месін барынша оңайлатуға кө­мектес­пек. Сондай-ақ Басқарма төрағасының орынбасары Сергей Инюшин өткен жылы корпоративті клиенттер саны 10 мыңнан асқанын, 100 мыңыншы банктік карта шығарылғанын, «Жас отба­сы» несиелік бағдарламасы бойынша бас­тап­қы жарна 30-дан 10 пайызға дейін тө­мендетілгенін атап айтты. Бұл да басты назарда клиенттер екендігін көрсетеді. Банк өз командасын дамытуға да үл­кен көңіл бөлуде. Мұнда коман­да­ны қолдау үшін айтарлықтай инвестиция салынады. Сірә, 2010 жыл қорытын­дылары бойынша «Ресей Жинақ банкі» тобы тартымдылық рейтингінде №1 жұмыс беруші атағын алса, таң­дануға болмас. Осындай рейтингтер Қазақстанда да өткізіліп тұрса, құба-құп. Өйткені, бүгін таңда керек кадрлар бәрін шешеді. Ендеше, таяудағы төрт-бес жылда Банк Қазақстандағы ілкімді жұмыс беруші ретінде де ілтипатқа ілінеді деп үміттенеміз. 2011 жыл Еншілес Банк үшін жақ­сы жаңалықтармен әйгіленуде. Жыл басында «Жинақ банкі» АҚ ЕБ және Оңтүстік Қазақстан облысы әкімдігі өзара ынтымақтастық туралы мемо­ран­думға қол қойып, республиканың ірі қалаларының бірі Шымкентте жаңа филиалдың Орталық офисі ашылды. Бұл реттік жағынан 13-ші филиал жә­не Қазақстандағы 105-ші нүкте. Бас­қарма төрағасының орынбасары Шухрат Садыров осындағы ғимарат­тың сәу­летінде қазақ халқының ұлт­тық на­қыштары, рәміздері, экономи­калық ны­шандары ескерілгендігіне, сайттар­дың да  ұлттық өрнектегі жаңа дизайнмен айшықталғандығына тоқталды. Ақпан айында  Алматыда Банк­тің еншілес компаниясы – «Сбербанк лизинг Казахстан» тіркелген. Банк үшін бұл маңызды оқиға бол­ды. Мұның өзі Банк моделі әмбебап коммерциялық банк екенін танытты. Демек, оның банктік қана емес, лизингілік қызмет кешенін ұсыну мүмкіндіктері мейлінше кең. 1 наурыздан бастап өнімдер тізімінде жаңа банктік өнім – «Иесіздендірілген металдық есепшот» пайда болғанын айту керек. Сонымен бірге ресей рубліндегі тұтынушылық несиелеу бағдарламалары бойынша несие алу мүмкіндігі көпшілік көңілі­нен шығып, ресей рубліндегі төлем карталары қолданысқа енді. Банктің 2015 жылға дейінгі негізгі даму стратегиясы елдің екінші дең­гей­л­і банктер нарығындағы қатысу үле­сін 5 пайызға дейін өсіру болып табы­ла­ды. Сонымен бірге үстіміздегі жыл Банк үшін мерекелі жыл. Себебі, Жи­нақ банкіне – 170 жыл, ал Еншілес Банктің Қа­зақстан аумағындағы қы­метіне 5 жыл толады. Олай болса, Банк­тің биылғы жылғы: «Бізге 170 жыл толды, бәрі әлі алда!» деген ұраны да көпшілікке түсінікті. Ең бастысы, өсім – тұрақты, сапа – жоғары, келешек – жарқын. Қорғанбек АМАНЖОЛ. Алматы. ______________ Суретті түсірген Берсінбек СӘРСЕНОВ.