Мәртебелі тұсаукесерде алдымен сөз алған белгілі ғалым-қаламгер, М.О.Әуезов атындағы Әдебиет және өнер институтының директоры Уәлихан Қалижанов бұл шараның «Егемен Қазақстан» газетінде жарияланған Елбасы – Қазақстанның Тұңғыш Президенті Н.Ә.Назарбаевтың «Болашаққа бағдар: рухани жаңғыру» атты мақаласымен тұспа-тұс келгеніне баса назар аударды. «Елбасының мақаласындағы «Туған жерге туыңды тік!» деген ұғым осындай шаралардан басталады, – деді қаламгер-ғалым. – Ұлттың көшін бастайтын, ұлттың рухын биікке көтеретін – кітап. Оның ішінде өлең – қазақпен етене туған құдірет. Қазақ өлеңмен қуанып, өлеңмен бірін-бірі жұбатқан. Заман қанша жерден алға озғанмен өлеңді еш уақытта компьютермен теріп жаза алмайсың... Өлең қадым заманнан бері тек қана қаламмен жазылған, сондықтан да, Манарбек, мен саған халқыңды қуантқан жыр жолдарың молая берсін деп қалам сыйлаймын!»
Қарымды қаламгердің ақындар-
дың жанына жағымды, құлағына жылы тиер осынау тілегін іліп ала жөнелген әрбір шешен мінберге шығып тұрып «Батырлар мен ақындар елінің» топырағында туып-өскен Сүйінбай мен Жамбылдың тарихи жырларына тоқталмай өткен жоқ. Халықтық жырдың қасиетінен нәр алып, жан сезімінің қыл пернесін қаламының ұшымен дәлдеп үлгерген Манарбек Ізбасаров бүгінгі тұсауы кесілген үш кітапқа дейін «Жанымда менің жалын бар», «Күй домбыра, саз ғұмыр», «Сәулесін төгіп, нұр сезім», «Жайымды қалай ұғарсың» атты барлығы жеті кітабын оқырманға ұсынғаны киелі топырақтың қасиеті екені жайлы және атап өтілді. Әдеби-сазды кештің көркіне айналған талант иесі туралы тереңнен тебірене сөз сөйлеген қаламдастары сегіз қырлы, бір сырлы Манарбектің проза жанрында да елеулі үлесі барын еске салды. 2006 жылы «Жазушы» баспасынан «Қазіргі қазақ прозасы» сериясымен шыққан «Табиғат хикаялары» атты әңгімелер жинағы соның айқын дәлелі болса керек-ті.
«Әуелде көпшілік жазу өнерін оңай көреді, қияметін біле бермейді», деп сөз бастаған «Қазақ әдебиеті» газетінің бас редакторы, жазушы Жұмабай Шаштайұлы бұл шараны бір кезде аудандық «Екпінді еңбек» газетінде «полк баласындай» болып үлкендермен теңесіп тер төге қызмет істеген Манарбектің мехнатының бүгінгі жеңіс тойы деп ой саралады.
Журналист, ақын, жазушы, баспагер азаматтың рухани саладан өз үлесін ала жүріп, бүгінгі таңда бизнес биігіне көтерілуі де көп жайттан хабардар етсе керек. «Рухани жаңғыру жолында бабаларымыздан мирас болып қалған, қанымызға сіңген бүгінгі тамырымызда бүлкілдеп жатқан ізгі қасиеттерді қайта түлетуде» қаламгер Манарбек Ізбасаровтың сіңірген еңбегі өте зор. Тек қана тарихи-танымдық мәні бар 20 кітап шығарған екен. Тарихтың қойнауынан сыр тартқан Сұраншы-Саурық, Медетбек батырлар, Құдайберді би, Байтелі баба, тағы басқа да тарихи шығармалар болашақ ұрпақ үшін өзіңнің ұлттық және жеке байлығыңды нақты білуге бағыт берері анық. «Әрбір өлкенің халқына суықта пана боп, ыстықта сая болған, есімдері ел есінде сақталған біртуар перзенттері бар» демекші, Манарбектің «Айтұмар» баспасынан шыққан халық үшін бойтұмардай болған тұлғалар қатары молая түсуде.
Жамбыл ауданы әкімінің орынбасары Дастан Шайнүсіпов, заң ғылымдарының докторы Арықбай Ағыбаев, арқалы ақын Орысбай Әбділдаұлы, ақын-композитор Жолдасхан Құрамысов, қауіпсіздік қызметінің генерал-лейтенанты Әділ Шаяхметов, Қазақ университетінің проректоры Әбдікерім Серікбаев, Қазақстан Республикасы соттар қауымдастығы төрағасының орынбасары Серік Байбатыров, ақын-жазушылар Нағашыбек Қапалбеков пен Доқтырхан Тұрлыбек және басқалары Манарбектің бойындағы ақындық қасиетімен қоса, туған жерге, оның тарихы мен мәдениетіне, салт-дәстүріне, бабалар мұрасына деген жанашырлық қасиетін баса көрсетіп, тілге тиек етіп жатты. Ақынның құрметіне ән айтылды, күй тартылды, жыр оқылды.
Қазақстан Жазушылар одағының мүшесі, Мәдениет қайраткері ақын Манарбек Ізбасардың әдеби-сазды кешін дөңгелетіп жүргізген ақын Бақыт Беделханның тілімен айтқанда, «ақынның оқырманына ұсынып отырған «Сағым», «Қоңыр күзім келдің бе?!», «Тағылым» атты жинақтары рухани жаңғыру сатысында жаңа қадам болған заманда күнде парақталып, күнде оқылып, өнегелі дүниеге айналсын», деп түйіндер едік.
Гүлзейнеп СӘДІРҚЫЗЫ,
Талғат СҮЙІНБАЙ,
«Егемен Қазақстан»
Алматы облысы,
Жамбыл ауданы
Суретті түсірген
Нұрманбет ҚИЗАТҰЛЫ
