Отырыс барысында Ұлттық комиссияның мақсаттары мен міндеттері, Мемлекет басшысының «Болашаққа бағдар: рухани жаңғыру» атты мақаласында ұсынылған бағыттарды іске асыру жолдары талқыланды.
Ұлттық комиссия Президент Жарлығымен қоғамдық сананы жаңғырту бағдарламасын іске асыру, елдің одан әрі ілгерілемелі мәдени-гуманитарлық дамуын қамтамасыз ету мақсатында құрылған болатын.
Өзінің сөзінде Ә.Жақсыбеков қоғамдық сананы жаңғырту тек жауапты ғана емес, сондай-ақ, нәтижесіне еліміздегі саяси және экономикалық жаңғырулар тәуелді ең күрделі учаске болып табылатынын атап көрсетті. «Мемлекет басшысы ХХІ ғасырда табысқа жету үшін ұлтымыздың, әрбір қазақстандықтың даму бағытын айқындап берді. Бұл тек жаңа институттар құрып, құқықтық нормалар қабылдау ғана емес. Бұл жерде әңгіме қоғамдағы қарым-қатынастарды жүйелі жаңартып отыру туралы болып отыр», деп атап өтті Ә.Жақсыбеков.
«Мұндай мақсат алдымызға біздің тарихымызда бұған дейін қойылып көрген емес. Оған жету әдеттен тыс көзқарас пен ерекше сипаттағы шешімдерді талап етеді. Бұған қоса, бүкіл орталық және жергілікті мемлекеттік органдардың, қоғамдық сектордың жұдырықтай жұмылуы қажет», деп атап көрсетті Қазақстан Республикасы Президенті Әкімшілігінің Басшысы. Осыған орай, деп түсіндірді ол, Ұлттық комиссия құрамына министрлер, әкімдер, жетекші қоғамдық-саяси, ғылыми, білім беру бірлестіктері мен сарапшылық ұйымдардың өкілдері еніп отыр.
Комиссия мүшесі, Қазақстан Жазушылар одағының төрағасы Н.Оразалин Қазақстан Республикасының Президенті Н.Назарбаевтың «Болашаққа бағдар: рухани жаңғыру» мақаласының тәуелсіз Қазақ елінің 25 жылдағы жеткен жетістіктерінің тоғысқан тұсында халықтың күткен құжаты болғанын тілге тиек етті.
Елбасының бұл идеясы қазір шын мағынасындағы ұлттың паспортын анықтайтын ұғымға айналғанын атап өткен ол: «Ұлттық паспорт – біздің мәдениетіміз, ұлттық паспорт – біздің тіліміздің тұтастығы, ұлттың бірегейлігі», деп баса айтты.
Осы ретте Н.Оразалин «Ұлттық аударма бюросына» қатысты да өз ұсынысын білдіріп, бұл құрылымның Қазақстанның, ұлттың мәдени-рухани, әдеби жәдігерлерін шетелде насихаттауда рөлі де, маңызы да зор болатынын айтты.
Сондай-ақ, ол: «Ұлттық комиссия жұмысын халыққа түсіндіріп, насихаттауда зиялы қауымды, соның ішінде қаламгерлерді жаппай тартуымыз керек деп ойлаймын. Мұндай тәжірибе бұрын да болған, рухани жаңғыру бағдарламасын іске асыруда бұл тәжірибенің ықпалы зор болатыны сөзсіз», деп сөзін түйіндеді.
Ал Комиссия мүшесі, Ақтөбе облысының әкімі Б.Сапарбаев өз сөзінде былай деді: «Жергілікті жерлерде, өңірлерде Мемлекет басшысының «Болашаққа бағдар: рухани жаңғыру» атты мақаласы қызу талқыланып, қолдау тауып жатыр. Халық бұл бастаманы саяси-экономикалық жаңғырулардың заңды жалғасы деп қабылдауда».
Сонымен қатар, Б.Сапарбаев «Қазақстанның жаңа 100 тұлғасы» жобасына да қатысты пікірін білдірді. Жергілікті жерлердегі, өңірлердегі атақты, танымал тұлғалар республикалық, мемлекеттік деңгейде насихатталса деген ойын айтты. Сондай-ақ, ол «Туған жер» жобасына тоқталып, Ақтөбе облысында іске асырылып жатқан экономикалық-әлеуметтік жобалардың басы-қасында отандық кәсіпорындардың, жергілікті азаматтардың тұрғанын атап өтті.
Ұлттық комиссия отырысының барысында, жұмыс топтарының жетекшілері аталды.
Мемлекеттік тілді латын қарпіне көшіру жөніндегі жұмыс тобын Тіл білімі институтының директоры Е.Қажыбек; «Жаңа гуманитарлық білім. Қазақ тіліндегі 100 жаңа оқулық» жобасы бойынша жұмыс тобын Білім және ғылым министрі Е.Сағадиев пен «Wikibilim» қоғамдық қоры қамқоршылар кеңесінің төрағасы Р.Кенжеханұлы; «Туған жер» жобасы бойынша жұмыс тобын Президент Әкімшілігі Басшысының орынбасары О.Оразалин мен Еуразия ұлттық университетінің ректоры Е.Сыдықов; «Қазақстанның киелі жерлерінің географиясы» жобасы бойынша жұмыс тобын Мәдениет және спорт министрі А.Мұхамедиұлы мен Тарих және этнология институтының директоры Х.Әбжанов; «Жаһандағы заманауи қазақстандық мәдениет» жобасы бойынша жұмыс тобын Президент Әкімшілігі Ішкі саясат бөлімінің меңгерушісі А.Балаева мен Сыртқы істер министрі Қ.Әбдірахманов; «Қазақстанның 100 жаңа тұлғасы» жобасы бойынша жұмыс тобын ҚХА Хатшылығының меңгерушісі Д.Мыңбай мен Ақпарат және коммуникациялар министрі Д.Абаев басқаратын болды.
Енді әрбір жұмыс тобы бір айлық мерзімде қажетті ресурстық қамтамасыз етуді ескере отырып, өздерінің іс-қимыл алгоритмін ұсынады. Бұған қоса, Қоғамдық сананы жаңғырту бағдарламасын іске асыру жөніндегі іс-шаралар жоспары мен Комиссия жұмысын регламенттейтін Ұлттық комиссия туралы ереже қаралды.
Ұлттық комиссия төрағасы жұмыс топтарының жетекшілеріне өз жұмыстарына алдыңғы қатарлы сарапшыларды тартуды тапсырды. «Сондай-ақ, саяси партияларды, «Атамекен» ұлттық кәсіпкерлер палатасын, сарапшылар мен ғалымдарды бұл үдеріске белсенді қатысуға шақырамын. Комиссия Қазақстанның барлық азаматтарының ұсыныстарын қарауға дайын», деді Ә.Жақсыбеков.
