Талқылауға үкіметтік емес ұйымдардың өкілдері, белгілі журналистер, сондай-ақ «Атамекен» Ұлттық кәсіпкерлер палатасының өкілдері қатысты. Жиын басында сөз алған министр Д.Абаев Мемлекет басшысы ведмоствоның алдына еліміздің ақпарат кеңістігін нығайту, отандық ақпарат құралдарының деңгейін көтеру, коммeникациялық инфрақұрылымды дамыту бойынша бірқатар міндеттер жүктегенін айтты. «Біз осы міндеттерді басшылыққа ала отырып, заң жобасын әзірлеуге оған ақпарат саласы мамандарының, үкіметтік емес ұйымдардың, жалпы қоғам өкілдерінің жан-жақты атсалысуына мүмкіндік бергенбіз. Жоба әзірленгеннен бергі уақытта көптеген талқылаулар мен қызу пікірталастар өткізілді. Бүгінгі таңда көпшіліктің ұсыныс-пікірлері ескеріле келе, жобаның негізгі бағыттары бойынша ұстанымдарымыз бір арнадан табылуда деуге болады», деді министр.
Жаңа құжат талқылауға шығарылғаннан кейінгі аралықта оған қатысты 200-ден астам ұсыныс түсіп, соның 70 пайызы құжатқа енгізілген. Жалпы алғанда, құжатқа 250-ге жуық түзетулер қарастырылған. Осы түзетулер негізінде 4 кодекс пен 12 заңға өзгерістер мен толықтырулар енгізілмек.
Заң жобасы қоғам талқысына ұсынылған тоғыз айға жуық уақыт ішінде тиісті жұмыс тобының үш отырысы өтіп, еліміздің барлық өңірінен келген өкілдердің қатысуымен қоғамдық талқылаулар ұйымдастырылған болатын. Министрлік жанындағы Қоғамдық кеңесте де талқыланған.
«Заң жобасымен жұмыс барысында қарапайым азаматтар тарапынан да көптеген өтініштер түсті. Әсіресе, балаларды қорғауға бағытталған бейнелері мен жеке деректерін жариялауды шектеуге, «баланың жасына сай ақпарат» ұғымын енгізу сынды шаралар қабылданды», деді министр.
Д.Абаевтың айтуынша, бүгінгі таңда «кибербуллинг», яғни әлеуметтік желілер, байланыс құралдары арқылы қудалау, ар-намысына нұқсан келтіретін әрекет жасау мәселесі өте өзекті болып отыр. Министрлік заң жобасында осы тектес мәселелерді назарға алуға ниетті.
Заң жобасы барлық орталық мемлекеттік органдармен, Президентке есепті қызығушылық танытқан органдармен, сондай-ақ 14 облыстың, Астана мен Алматы қалаларының әкімдіктерімен, бас-аяғы 35 органмен келісілген. Қазіргі таңда құжат жобасы Үкіметте қаралуда.
Жиын барысында Ақпарат және коммуникациялар министрлігі БАҚ саласындағы мемлекеттік саясат департаментінің директоры Елдос Нәшірәлі БАҚ-тардың экономикалық жүктемесін жеңілдету, яғни ұсақ заң бұзушылықтар бойынша тиражды тәркілеу немесе БАҚ-тың жұмысын уақытша тоқтату сынды нормаларды алып тастау ұсынылып отырғанын айтты. Бұдан басқа, мемлекеттік органдар, ұйымдар және БАҚ-тар арасында өзара іс-қимыл жөніндегі арнайы өкілдер, құрылымдық бөлімшелер туралы да өзгеріс енгізіліп отыр.
Жалпы, заң жобасы БАҚ, телерадио таратылымы, ақпараттандыру және байланыс салаларындағы қатынастарды құқықтық тұрғыда регламенттеуге бағытталған.
Арнұр АСҚАР,
«Егемен Қазақстан»
Суреттерді түсірген Ерлан ОМАРОВ,
«Егемен Қазақстан»
