«Құрметті Бақытжан Әбдірұлы! Менің депутаттық сауал жолдауыма азаматтық және мемлекеттік авиация саласындағы ұшу қауіпсіздігін қамтамасыз етудің тиімсіз жүйесі себеп болып отыр. Қазіргі уақытта азаматтық авиация саласын сертификаттау, сондай-ақ ұшу қауіпсіздігін қадағалау мен бақылау функциялары Қазақстанда бір ғана органның – Қазақстан Республикасы Инвестициялар және даму министрлігі Азаматтық авиация комитетінің қарауына берілген, яғни сол мемлекеттік орган сертификаттайды және қадағалау мен бақылауды жүзеге асырады.
Бұл қалыптасқан жағдай, меніңше, қабылданатын шешімдердің объективтілігін қамтамасыз етпейді, сыбайлас жемқорлық пен құқық бұзушылыққа жағдай туғызады, соның негізінде авиациялық оқыс оқиғалардың туындау тәуекелдері арта түседі. Егер статистикаға мән берсек, 2012 жылдан 2016 жылға дейінгі уақыт ішінде Қазақстанда 30-дан астам авиаапаттар мен оқыс оқиғалар орын алып, 85-тен аса адамның өмірі қиылды, бұл сертификаттау мен қадағалау рәсімдері сапасының төмендігін көрсетеді.
Осыған байланысты, біріншіден, азаматтық және мемлекеттік авиациядағы сертификаттау, қадағалау және бақылау жөніндегі мемлекеттік функцияларды әртүрлі мемлекеттік ведомстволарға қайта бөлу қажет. Екіншіден, Қазақстан Республикасының Үкіметі жанынан ұшудың қауіпсіздігін қадағалауды жүзеге асыратын және авиациялық оқыс оқиғаларға тергеп-тексеру жүргізетін дербес мемлекеттік орган құру керек. Бұл органның қызметі азаматтық авиация саласымен ғана шектелмеуі тиіс. Оның қадағалауы мен бақылауына мемлекеттік органдар авиациясының қызметі де (ҚМ, ҰҚК, ІІМ және т.б.) жатуы қажет, себебі бұл мемлекеттік органдардағы ұшу қауіпсіздігін қамтамасыз етумен және авиаапаттарды тергеп-тексерумен байланысты қалыптасқан жағдай, ол да жақсартуды қажет етеді. Әлі күнге дейін мемлекеттік авиациядағы (ҚМ, ҰҚК Шекара қызметі, Ұлттық ұлан) және жекеменшік авиациядағы соңғы жылдары орын алған апаттардың, оқиғалардың ресми түрде жарияланған нақты анықтамасы жоқ. Осы себептен авиациялық оқиғаларға профилактика жүргізу мүмкін болмай отыр.
Сондай-ақ, ұшу қауіпсіздігін қамтамасыз ету мәселесін бірнеше мемлекеттік құрылымның жұмысымен байланысты кешенді міндет ретінде қарау керек. Оны шешудің жолдары осы саладағы ғылыми-зерттеу жұмыстарының нәтижелеріне, оларды қамтамасыз ету практикасына ендіруге де байланысты. Сонымен бірге, ұшу қауіпсіздігін тиісті қадағалау мен бақылауды қамтамасыз ету, әсіресе, соңғы уақыттарда орын алып отырған террорлық актілердің жандануы аясында өте маңызды. Бұған қоса, бүгінгі таңда ұшақсыз ұшатын аппараттардың әуе кеңістігін пайдалануына да бақылау жоқ.
Баяндалғанның негізінде, көрсетілген мәселелерді қарауыңызды және қарау нәтижесі бойынша заңда белгіленген мерзімде жазбаша жауап беруіңізді сұраймын».
