«Біз өткен жылы Қазақстан халқының бірлігі күні Қостанайдың орталық алаңында осы өңірде тұратын түрлі ұлыстардың музыкалық аспаптарынан көрме ұйымдастырған едік. Ол қостанайлықтарға ұнап, оны қызықтаушылардың қарасы азаймаған еді. Енді биыл музыкалық аспаптарды тек көрсетіп ғана қоймай, оның әуенін тыңдатқымыз келді. Музыка адамдарды жақындастыра түседі, музыка тілінде достық сыйлайтын құдірет бар» деді Қазақстан халқы облыстық ассамблеясының баспасөз хатшысы Зүлфия Набиева.
Фестивальге жиналғандар түрлі ұлыстардың музыкалық аспабының дауысын естіді. Азербайжанның саз, орыстардың қасығы, шығыс халықтарының нагарасы, қазақтардың дабылы, домбырасы секілді өзге ұлттардың да халық аспаптарының үні ерекше, кімнің де болса жанын баурағандай еді. Сиви Хасымова әзербайжан халқының саз аспабында өте шебер ойнайды.
«Бұл өнер маған аталарымнан дарыған. Маған мына аспапты сатып әперген. Мұнда азербайжан халқының түрлі әуендерін ойнаймын, ән айтамын. Мен қостанайлық азербайжан жігітке тұрмысқа шығып, осындағы Денисов ауданында тұрып жатқаныма төрт жыл болды. Өзіммен бірге осы саз аспабын алып келдім. Маған Қазақстан өте ұнайды, тұрып жатқан ауданда қазақтармен, өзге ұлт өкілдерімен жақсы сыйласамыз, дос болып кеттім. Оларға менің әнім де ұнайды» дейді Сиви.
Зүлфия Набиеваның айтуынша, келесі фестивальге облыс өңірінің өнерпаздарын түгел қамитын болады. Алдағы уақытта фестивальдің ауқымы кеңейе түседі. Фестиваль Қазақстандағы ұлт пен ұлыстар достығын нығайту, олардың бірі-бірінің дәстүрін, мәдениетін жақынырақ білуін, әр ұлыстың әуеніндегі, өнеріндегі сұлулықты паш етуді мақсат тұтты.
Нәзира Жәрімбетова
«Егемен Қазақстан»
ҚОСТАНАЙ
