Еліміз бойынша қызу талқыланып жатқан маңызды мақала мәдениет саласы мамандарының да назарынан тыс қалмады. Жиынға қатысушылар өз ойларын білдіріп, Президент белгілеп берген міндеттердің өзектілігіне тоқталды.
– Мақалада айтылған негізгі бағыттарды жүзеге асыруда бәріміз белсенділік танытуымыз қажет. Себебі, еліміздің жарқын болашағы ертеңгі ұрпақтарымыздың жақсы өмір сүру кепілі болмақ. Президентіміз «Жаңа тұрпатты жаңғырудың ең басты шарты – сол ұлттық кодыңды сақтай білу. Онсыз жаңғыру дегеніңіздің құр жаңғырыққа айналуы оп-оңай» деп, рухани жаңғыру рухани болмысымызды сақтауда жатқанын атап көрсетті. Өйткені, біздің барлық бай мұраларымыз тарихымыз бен мәдениетімізде, әдебиетіміз бен өнерімізде екені даусыз. Тарихтан терең тамыр алып, рухани құндылықтарымызды дәріптесек, кемел келешекке жарқын жүзбен жетеміз. Мақалада қамтылған бәсекелік қабілет мәселесі де өте орынды айтылған деп есептеймін. Елбасының «Болашақта ұлттың табысты болуы оның табиғи байлығымен емес, адамдарының бәсекелік қабілетімен айқындалады» дегені бәрімізді ойландыруы тиіс. Мемлекетіміз әрдайым өнер ұжымдары мен бірлестіктерін қанатының астына алып қолдау көрсетіп келеді.
– Мақалада нысанға алынған әр бағыт халқымыздың болашағы үшін қызмет ететін өміршең құжат деп түсінеміз. Еліміздің мәдениет саласының биікке өрлеуі мемлекетіміздің саяси дамуымен тығыз байланысты, – дейді Жамбыл атындағы Қазақ мемлекеттік филармониясының директоры Жеңіс Сейдуллаұлы.
Жиын барысында «Ұлттық бірегейлікті сақтау», «Прагматизм», «Білімнің салтанат құруы» сынды тақырыптар жеке-жеке сөз болды. Қазақстанның Халық әртісі Нұрғали Нүсіпжанов: «Дана халқымызда «Жаздың бір күні қыстың бір айына азық болады» дейтін керемет сөз бар. Президентіміздің халыққа серпін беруі, болашаққа деген қадамымызды нықтап, бағытымызды айқындап берді. Еліміздің дамуы, халқымыздың бейбіт өмірі, экономикамыздың өрістеуі, мәдениетіміз бен өнеріміздің кеңге қанат жаюы − бәріміздің басты тілегіміз. Елбасымыздың жарқын бастамасын әрі қарай іліп әкетіп жүзеге асыруға атсалысу әр қоғам мүшесіне артылатын міндет деп есептеймін. Отанымыздың гүлденуі – бәрімізге ортақ мұрат», деп жиналғандарға ой салды.
Сондай-ақ, «Қазақстандағы 100 жаңа есім», «Қазақ тіліндегі 100 жаңа оқулық» сынды бастамаларға қатысты ой-пікірлер ортаға тасталып, әр бағыттың маңыздылығы туралы кең мазмұнда айтылды.
Арман ОКТЯБРЬ,
«Егемен Қазақстан»
АЛМАТЫ