«Достық» аллеясы ашылды

Кеше Семейде осындағы жаңа көпірдің сол жаға­лау­ын­да «Достық» аллеясы салта­нат­ты жағдайда ашылды. Об­лыстың жер-жерінен осы ша­раға арнайы шақырылған түрлі ұлт өкілдері, қала жұртшы­лы­ғы бес алаңға топтастырылды. Бірінші алаңға жиналғандар саламатты өмірді насихаттаса, екінші алаңдағылар ұлттық ой­ын түрлері бойынша өнер көр­сетіп жатты. Ал келесі алаң­дағылар еліміздегі бейбітшілік пен өзара келісімді бейнеледі.Осы жерге Астанадағы Бейбітшілік және келісім сарайының макеті қойылды. Қай алаңның болсын өзіндік мәні зор болды. Олардың әрқайсысын 200-ден 500-ге дейін қала тұрғындары тамашалады. Бұдан кейін жаңадан ашы­лып отырған «Достық» аллея­сы­на 20 ұлт өкілдері 20 түп ағаш отырғызды. Игілікті шара соңында әлгі 20 ұлт өкілдері қолынан 20 көгершін көгілдір аспанға шарықтап ұшты. Флеш­мобқа қатысушылар болса, бір мың шарды биікке самғатты. Осы тұста аспанда «Достығымызға – 20 жыл» деген жазу пайда болды. Сол күні мұнда «Ар-Нұр» деп аталатын жастардың бизнес орталығы да салтанатты жағ­дайда ашылды. Жинал­ған­дарды осы орталықтың иесі Әсет Досқожанов өз мақсат­тары­мен таныстырды. Бір кезде иесіз қаңырап қалған үлкен ғимараттың қатарға қосылуы семейліктерді қай жағынан бол­сын қуанышқа бөледі. Шын­дығында оның қайта жөн­де­ліп қатарға қосылуы қала ор­талығының ажарын аша түсті. Ал осы екі шараның ал­дын­да қаладағы бірінші жылу энер­гетикалық орталығының жаңа­дан салынып жатқан қазандығы іске қосылған еді. Бұл да семейліктер көптен асы­ға күтіп жүр­ген маңызды шаруа болатын. Аталған ша­ра­лардың бәріне де облыс әкімі Бердібек Сапарбаев арнайы келіп қатысты. Түс ауа қалалық әкімдікте облыстық әкімдіктің көшпелі мә­жілісі болып өтті. Онда да Семейді одан әрі көркейту мәселесі қоз­ғалды. Тәуелсіздік мерекесі қар­саңындағы мұндай шаралардың  қажеттілігі айтпаса да түсінікті. Дәулет СЕЙСЕНҰЛЫ. Семей.