Ол ашқан «Балбырауын» домбыра оркестріне көпшілік дән риза. Жақында ғана өткен Латиф Хамиди атындағы республикалық конкурста Нөкісбай ағаның оркестрі 2-ші орынды жеңіп алып, лауреат атанды. Бұл музыка мектебінде Людмила Кравченко, Сергей Попов сынды кәсіби білікті маман, ұстаздар бар. Олар орыс ұлтының өкілдері болса да, қазақ музыка өнеріне деген ықыластары ерекше. Латиф Хамиди атындағы конкурста осы ұстаздардың «Көңілді ноталар» ансамблі биыл Гран-при иеленді. Музыка мектебінде Аяжан Құдайберген, Адина Құсайынова, Ая Жапишева, Агиля Бекқожина, Даша Чебокова, Миша Соснин, Дима Чуприн, Леша Леонтьев, Кирилл Божко, Арсен Нұғұманов, Балнұр Тлеукешова, Батырхан Абулхасенов сынды ерекше дарынды шәкірттер оқиды.
– Ең бастысы, әрбір шәкірт бойындағы талантты аша білуіміз керек, – дейді Людмила Кравченко. – Сонда біздің ұрпақ тек ғылым мен техника саласында ғана емес, өнерде де бағы оза шабады. Домбыра мен қобызды үйреніп, скрипка тартып, ән салған, өнер додасында жұлдызы жанып, еңбегі еленген бала да, ата-ана да, ұстаз да әрқашан бақытты. Нөкісбайды біз құрметтейміз. Оған келген әр кішкентай бала домбыра тартуды үйренуі өз алдына, қазақ музыка өнерінің теориясынан, тарихынан тәлім-тәрбие алып шығады. Құрманғазы мен Тәттімбеттің, Динаның күйлерін орындап, музыкалық білімі бар нағыз маман болып шығады.
Раушан НҰҒМАНБЕКОВА
СЕМЕЙ