Туған Отанымызды қорғауға жоғары кәсіби дайындық қажет

Кеше Елбасы Нұрсұлтан Назарбаев Қарағанды облы­сына жұмыс сапарымен келді. Сапар «Отан қорғаушылар күні» қарсаңында болып отырған себепті Президентке Қа­зақстан әскерінің Қарағанды гарнизонының құрамалары мен бөлімдерін таныстырудан басталды. Алдымен Қорғаныс министрі Әділбек Жақсыбеков Мемлекет басшысы – Қарулы Күштердің Жоғарғы Бас қолбасшысын әс­ке­ри гарнизонның жауынгерлік әзір­лігімен және әскери инфра­құ­рылымдар мүмкіндігімен таныс­ты­рды. Президентке 50185-ші әс­кери бөлімнің жауынгерлік кезекшілікте тұрған авиациялық тех­никасы мен техникалық лабора­то­риясы көрсетілді. Осыдан әрі Президент Миг–31 ұшағының жұмыс регламентімен және кешенді тренажердің жұмысымен танысты. Еліміздің әуе шебін қорғаушы қорғаныс күштеріміздің ұшқыш­та­ры бірнеше рет халықаралық ойын-жаттығуларға қатысқанын атап өткен жөн. Олардың бәрінде де біздің ұшқыштарымыз дайын­дықтарының жоғары дәрежеде екенін көрсете білді. Ал өзімізде былтырғы жылы тоғыз авиация жаттығулары өткізілді. Әскери-әуе күштерінде дайындық өл­ше­мі ұшу сағатының ұзақтығымен айқындалады. Біздің әскери-әуе күштеріміздің жалпы ұшу ұзақ­тығы бүгінгі күнге дейін 25 мыңнан аса сағатты құрап отыр. Ал әрбір ұшқыштың ұшу ұзақ­ты­ғы 83 сағат болды, бұл – ТМД-ның басқа елдерімен салыс­тырғанда үздік көрсеткіш. Әскери-әуе күштерінің дай­ын­дығын көрген соң Елбасының кортежі Қарағандыдан 30 шақы­рым жерде орналасқан «Спасск» оқу-жаттығу орталығына қарай бет алды. Мұнда Қазақстан әс­ке­рінің мобилизациялық резервін дайындықтан өткізу жұмыстары ұйымдастырылған. Қазақтың ұс­ақ-шоқыларының арасындағы жазыққа орналасқан орталықтың аумағы біршама кең екен. Елбасы – Қазақстан Қарулы Күштерінің Жоғарғы Бас қолбасшысы келген кезде мұнда күн жарқырап, аспан барынша ашық болып тұрды, үп еткен жел де жоқ. Орталықтың бастығы, подполковник Д.Хамитов Елбасына оқу-жаттығу барысы туралы баяндап берді. Былтырғы маусым айында ашылғаннан бері орталықта 700-дей адам бір айлық дайындықтан өтіпті. Олардың жас мөлшері 27-35 аралығында. Бұрын әскерде болмаған мұндай жандар әскер өмірінен мол мағлұмат алып, бір айдың ішінде түрлі қару түр­ле­рін, байланыс құралдары мен әскери техниканы қалай қолда­ну­ды еркін меңгеріп аттанады екен. Жалпы, елімізде бұдан басқа да осындай сегіз орталық бар кө­рі­неді. Биыл осы орталықтар ар­қы­лы жалпы саны 4000-ға жуық адам әскери дайындықтан өтеді. Енді мұндай орталықтар биыл Семей, Тараз, Ақтау қалала­рын­дағы әскери бөлімдерде де ашылыпты. Н.Назарбаев әскери дайын­дық­­тан өтіп жатқандармен әңгі­мелесіп, оларды Отан қорғау­шы­лар күнімен құттықтады. Әскери жиынға қатысу арқылы сіздер шынығып, әскери өмірдің шың­далу мектебінен өтесіздер. Сөй­тіп, Қазақстан Республикасының қор­ғаныс қабілетін нығайтуға өз үлестеріңізді қосасыздар. Кез келген армияның жауынгерлік қа­білеті заманауи қару-жарақ және әскери техникамен қам­та­масыз етілгенінде емес, бірінші кезекте мамандардың кәсіби­лі­гімен анық­талады. Сіздер сол іске енді дайын боласыздар, деді Президент. Осы сапар барысында Мемлекет басшысы Ш.Уәлиханов атын­дағы Кадет корпусының осында әкелінген бір топ түлектерімен де кездесіп, оларды да Отан қор­ғау­шылар күнімен құттықтады. Одан кейін еліміздің басқа әскери бөлімдерінен келген сержанттар өкілдерімен кездесті. Қазір кә­сі­би сержанттар әскери бөлімдер мен бөлімшелерде лайықты қыз­мет атқарып жүр. Сержанттар да Кадет корпусында дайындалады, оның алғашқы түлектері 1996 жылы түсіп, 1999 жылы оқу­ла­рын бітіріп, қазір әскерде қызмет етуде. Әлемнің алдыңғы қатарлы елдерінің тәжірибесі негізінде ұйымдастырылған корпус бітіруші сержанттар әскердің жауын­гер­лік қабілеті мен дайындықтан өтуге келген резервтің дайындық сапасын арттыруға үлкен үлес қосып жүр. Оның үстіне әскердің ішіндегі тәртіптің түзелуіне де сүбелі үлес қосуда. Елбасы Ш.Уәлиханов атын­да­ғы Кадет корпусын бітіріп, әс­керде үздік қызмет етіп жүрген сержанттармен біршама әңгіме­лесті. Біз сержанттар қатарына қыз­меткерлер дайындауда көп ба­лалы және аз қамтылған отбасы­ларының балаларын алып, тегін оқытып, артынан қызмет етуді мақсат еткен едік. Сол мақса­ты­мыз қазір толығымен орындалып, әскер қатарында жүздеген сержант келісім-шарт негізінде қыз­мет етуде. Олар әскермен бірге тұрып, олардың барлық мұқтаж­дарын біліп, олардың шешілуіне көмегін тигізіп отырады. Бұл тәжірибемізді ТМД-ның басқа елдері де қазір бізден үйренуде, деді Елбасы. Жоғарғы Бас қолбасшы ар­нау­лы мақсатта ұйымдастырылған бөлімшелердің жаттығу қимыл­да­рымен танысты. Олар Елба­сына ғимаратқа шабуыл жасау, кепілге алынғандарды азат ету, сондай-ақ түрлі кедергілерден өту секілді күрделі элементтерді көрсетті. Әскерилер өзара ынты­мақтаса отырып, бейбіт тұрғын­дарға шабуыл жасаған содыр­лар­дың тобын жою бойынша ойын­дар қойды. Жоғарғы Бас қолбасшы әске­ри бөлімде болған сапарының соңында БАҚ өкілдерімен шағын баспасөз мәслихатын өткізді. Онда Елбасы тәуелсіз елдің өзіндік әскері болуы қажеттігін, қазір Қазақстан армиясы үш түрлі әскер түрінде толық жасақталып, елдің тұтастығы мен бостан­ды­ғын қамтамасыз ету жолындағы өзінің міндетін орындауға дайын екендігін айтты. Бүгінгі күні біз еліміздің іші-сыртындағы жағ­дайға, экономикамыздың мүмкін­дігіне, жеріміздің үлкендігіне сәй­кес келетін қажетті мөлшер­дегі әскерді құрдық. Аса үлкен әскер ұстаудың бізге қажеті жоқ, бірақ біздің әскеріміз барынша кәсібилендірілген, білімді болуы керек. Қазір біздің әскеріміз сондай деңгейге жетті деп айта аламыз. Әскерилердің 60 пайызы келісім-шартпен қызмет ететіндер. Олар өздерінің алдына қой­ыл­ған барлық міндетті орындауға әзір, дей келіп, Президент соның ішінде қазақстандық батальон­ның Тәжікстандағы содырлармен шайқаста өзіндік келбетін таны­тып, үздік бөлімдердің бірі бол­ға­нын атап өтті. Мен еліміз тәуелсіздігін алған күннен бастап Қарулы Күштеріміздің қалыпта­суы мен дамуына үлкен көңіл бөліп келемін. Әскерді қажетті мөл­шердегі заманауи қару-жа­рақпен, әскери техникамен толық қамтамасыз еттік. Әскерилердің әлеуметтік мәселелерін шешу жылдан жылға жақсарып келеді. Енді үлкен құрамаларға бұйрық бере алатын командирлерді де дайындау мүмкіндігіне өзімізде қол жеткізетін боламыз. Астанада Қорғаныс министрлігінің университеті салынып жатыр, үлкен шенді офицерлер сонда дайын­далады, деді Мемлекет басшысы. Өзінің бүгінгі көрген мәселе­лері жайында айтқанда, Президент әскери дайындықтардың дұ­рыс жолмен дамып келе жат­қанын атап өтті. Соның ішінде бір айлық дайындықтан өтіп жатқандар туралы жақсы пікірін жеткізді. Ал «содырларды құрық­тау» мәселесіне тоқталғанда да дайындық барысына өзінің ри­зашылығын білдірді. БАҚ өкілдерімен кездесуден кейін Жоғарғы Бас қолбасшы әс­кери ойындарға қатысқан жеке құ­рам­мен де жүздесіп, олардың ара­сындағы үздіктерге алғыс жа­риялады. Бүгін Елбасының Қараған­дыға жұмыс сапары одан әрі жалғасады. Жақсыбай САМРАТ, Айқын НЕСІПБАЙ.