Өнерде жоқ шекара

«Қазақстан» Орталық концерт залында Шанхай ынты­мақ­тас­тық ұйымына мүше мемлекеттердің Өнер фестивалі және ЕурАзЭҚ ха­лықтары мәдениеттері ІІ фести­валі­нің ашылу салтанаты өтті. Биылғы жыл Қазақстан тарихында екі үлкен жаңалықпен есте қалары сөзсіз. Оның бірі Тәуелсіздігіміздің 20 жылдық мерейтойы болса, екіншісі 10 жылдық мерейтойын өткізіп отырған Шанхай ынтымақтастық ұйымы Саммитіндегі Қазақстанның төрағалығы. Естеріңізге сала кетейік, қазақ жерінде осымен екінші рет өткізіліп отырған ШЫҰ Саммиті алғаш рет 2005 жылы өткізілген болатын. Еуразиялық экономикалық қауым­дас­тығы интеграциялық комитетінің мә­дениет бойынша кеңесінің жина­лы­сы мен Шанхай ынтымақтастық ұйы­мына кіретін мемлекеттердің мәде­ниет министрлерінің   жиналысы аясында өт­кен ЕурАзЭҚ және ШЫҰ өкілдері-мемле­кет­терінің мәдениет фес­тивалінің концерттік бағ­дарлама­сында Ре­сей, Қы­тай, Қырғыз­стан, Тә­жік­стан, Белоруссия, Қа­зақстан әртіс­тері өз өнер­лерін көрсетті. Дәстүр бойынша ма­мыр айы – елімізде Қа­зақ­стан халқының бірлігіне арналған. Соған орай ЕурАзЭҚ мәде­ниеттері фестивалі Қа­зақ­станның басқа қала­ларында да өз жалғасын таппақ. Бүгін еліміздің екі қаласында жеке концерт ұйымдастырылады деп күтілуде. Яғни, Көкшетау қаласының фи­­лармониясында, Қа­ра­ғанды қаласы­ның К.Станиславский атындағы орыс драма театрында осын­дай концерттер өтпек. Онда Қытайдың  Цзилинь аймағының ән және би ансамблі, Ресей Федерациясынан «Боян» мем­лекеттік орыс академиялық театры, Тә­жік­стан мемлекетінен «Лола» мемлекеттік би ансамблі, Қырғызстан елінен «Шат­­тық» халықтық хорео­гра­фиялық және «Ақақ» ансамблдері өз өнерлерін сарапқа салады. Бір айта кететін жайт, ЕурАзЭҚ халықтары мәдениеттерінің II фес­тивалінің жабылу рәсімі 21 мамыр күні елордадағы Конгресс-холл концерт залында өтеді. Онда өз өнер­паздарымызбен қатар, Ресей Фе­де­рациясының, Қырғызстан, Тәжік­стан елдерінің әртістері де өнер көрсетпек. Жұлдыз БАЙДІЛДА.