Білім және ғылым министрлігі жанындағы Ғылым комитетінің Философия және саясаттану институты Алматы қаласында Қазақстан Республикасы тәуелсіздігінің 20 жылдығына арнап «Тәуелсіз Қазақстанның халықаралық дәрежесінің өсуі және жаһандану жолы» атты халықаралық ғылыми-тәжірибелік конференция өткізді.
Конференцияға философия және саясаттану институтының директоры Ә.Нысанбаев, Білім және ғылым министрлігі Ғылым комитетінің хатшысы Б.Қасымбеков, Парламент Мәжілісінің Халықаралық істер, қорғаныс және қауіпсіздік комитетінің мүшесі, профессор К.Бұрханов, Сенат депутаты А.Бижанов қатысып, еліміздің халықаралық қатынастар жүйесіндегі рөлі мен орнына талдау жасады. Жиында мұнан өзге Қазақстанның сыртқы саясаты, ЕҚЫҰ төрағалығындағы жетістігі, ШЫҰ саммиті, Ислам Конференциясы Ұйымы төрағалығы және ислам әлеміне өзін бірегейлеуі, Н.Назарбаевтың Еуразия доктринасы, Қазақстан мен Орталық Азия мемлекеттерінің ХХІ ғасырдағы әлемдік тәртіп жағдайындағы орны сияқты бірқатар маңызды мәселелер қозғалды.
Еліміз өз тәуелсіздігінің 20 жылдық жолында әлеуметтік-экономикалық даму, саяси жүйені қалыптастыру секілді үлкен жетістіктерге қол жеткізіп, халықаралық сахнада жоғары беделге ие болды. ЕҚЫҰ төрағалығы мен аталған ұйымның саммиті, ИКҰ мен ШЫҰ-ның ынтымақтастық саммиті секілді өткізілген және жоспарланған ірі шаралар еліміздің сыртқы саясатының да өзіндік бағыт-бағдарында үлкен орынға ие екендігін айғақтап берді.
Қанат ЕСКЕНДІР, журналист. Алматы.
