Кооператив құрмай, кәсіптерінің алға баспайтынын ауылдағы жұрт енді-енді түсіне бастаған секілді. Қазіргі уақытта 18 кооперативі бар, негізінен мал шаруашылығымен шұғылданатын Тарбағатай ауданы жыл аяғына дейін тағы да 12 кооператив құруды жоспарлап отыр. Аудандағы бұрыннан жұмыс істеп келе жатқан «Көкжыра» өндірістік кооперативінде 18 мың қой, 580 жылқы, 500 сиыр, мың гектар суармалы жер бар екен. 182 мүшесі бар кооперативтің бас зоотехнигі Нұрлан Марқабаев ірі қара мен қой санын көбейтуді жоспарлап отырғандарын жеткізді. Біз барғанда кооператив мүшелері соқа-саймандарын сайлап, көктемгі егіске әзірленіп жатыр екен. «Бір ғана мәселе жанымызға батып тұр. Көктемгі егіс жұмыстарына 14 мың тонна жанар-жағармай қажет. Бізде бары – 10 мың. Павлодарда 108 теңгеден жеңілдікпен босатылатын солярканың бағасы бізге жеткенше 137 теңге болады», дейді осы кооперативтің агрономы Сайлау Құрмаш.
Қазіргі уақытта ауыл шаруашылығы саласына мемлекет тарапынан ерекше қолдау көрсетіліп жатқаны белгілі. Кәсіп ашуға ниетті азаматтарға жеңілдікпен несиелер де беріліп жатыр. Тарбағатай ауданын аралағанда мемлекет берген мүмкіндікті тиімді пайдаланып, кәсібін дөңгелентіп жатқан шаруалардың көп екенін, ауыл тұрғындарының мал өсіруге деген құлшынысының артқанын аңғарғандай болдық. Әсіресе ауданда мал бордақылау алаңдарын ашып жатқан адамдар қатары жылдан жылға көбейіп келеді екен. Аудан әкімі Ділдәбек Оразбаев қазіргі уақытта Тарбағатайда 250 мал бордақылау алаңының бар екенін, жыл аяғына дейін бұл көрсеткішті мыңға жеткізуді жоспарлап отырғандарын айтты.
«Ауданда жыл басынан бері 7 мыңнан астам ірі қара сатылды. Халық малды бордақылаудың тиімділігін енді-енді түсіне бастаған секілді. Біз мал бордақылау алаңдарын ашқан, ашқысы келетін тұрғындарға малды семіртудің, яғни бордақыдағы малға берілетін азықтың құрамын жан-жақты түсіндіріп жатырмыз. Ветеринар мамандарға бордақылау алаңдарына қажетті бірыңғай нұсқаулық әзірлеуге тапсырма берілді», дейді аудан әкімі.
Тарбағатай ауданының шаруалары мемлекеттік «Сыбаға» бағдарламасы арқылы соңғы үш-төрт жылда 5 мыңнан астам мал сатып алыпты. Тек 2016 жылдың өзінде 1600 бас ірі қара сатып алынған көрінеді. Аудандағы асыл тұқымды мал шаруашылықтарының саны 12-ден 60-қа дейін ұлғайыпты.
Аудан техника сатып алудан да көш бастап тұр. Өңір шаруалары «Агробизнес-2020» бағдарламасы арқылы соңғы үш жылда 200-ден астам жаңа трактор сатып алыпты. Аудан әкімдігі мемлекеттік бағдарламаларды ауыл тұрғындары арасында түсіндіру үшін арнайы жұмыс топтарын құрған көрінеді. «Ауылдағы несие алуға ниетті тұрғындарды қалаға сол ауылдың әкімімен бірге жіберіп жатырмыз. Ауыл әкімі өзі бірге барады, бәрін қадағалайды, көмектеседі. Соның арқасында мемлекеттік бағдарламалар жақсы игеріліп жатыр. Былтыр Тарбағатай ауданы 1 млрд 200 миллион теңге көлемінде субсидия алды. Аудан тұрғындары мемлекет тарапынан көрсетіліп жатқан көмектерге дән риза» дейді Ділдәбек Оразбаев.
Азамат ҚАСЫМ,
«Егемен Қазақстан»
Шығыс Қазақстан облысы
