– Мен 2012 жылдан бері осы әскери салада қызмет етіп келе жатырмын. Биыл командирлер бізді іріктеп, талапқа сай келеді деген әскери қызметшілерді осы шеруге қатыстыратын болды. Осындай сенімге ие болғандардың бірі – мен боламын, − дейді ол. − Шеруге қатысатынымды естігенде қуанышпен қатар, жауапкершілікті сезіндім. Миллиондаған адам тамашалайтын бұл шеруге қатысу зор мәртебе деп білемін. Шеруге қатысуды әрбір сарбаз армандайды. Мен соңғы рет Ұлы Отан соғысының 70 жылдығына орай өткізілген шеруге қатысыппын. Енді, міне, биыл екінші рет қатысқалы отырмын. Біздің мақсат – шеруді жұрт айта жүретіндей зор абыроймен өткізу. Дайындық ойдағыдай өтуде. Әрбір әскери бөлім өздеріне тапсырылған міндеттерді жоғары деңгейде орындап жатыр.
Осындай шеру өткізу арқылы біз бүкіл әлемге еліміздің әскери қуатын көрсете аламыз. Бұл – өте маңызды. Сарапшылар дүние жүзі мемлекеттері қарулы күштерінің рейтингісін жасайтын кезде мұндай шерулер оң әсерін тигізеді.
Сондай-ақ, жас ұрпақ әскери шеруді көріп өссе, оның бойында патриоттық һәм мақтаныш сезімі оянады. Патриот жастар елі мен жеріне қызмет етуге әрқашан дайын болады. Жаман айтпай жақсы жоқ, егер ел басына күн туа қалса, онда осындай азаматтар бірінші болып қолдарына қару алып, елін, жерін жаудан қорғайтын болады.
Отаншыл жастар – ел қорғаны. Мен әлі үйленген жоқпын. Болашақта отбасын құрып жатсам, ұлым да мен секілді әскери салада қызмет істесе деймін. Бұл – қызығы мен шыжығы мол сала. Мұнда тек нағыз ер азаматтар ғана қызмет етеді. Кейде шаршаймын. Дегенмен, сондайда ата-бабаларымыз ақ найзаның ұшымен, ақ білектің күшімен қорғап қалған қасиетті де киелі жерім үшін, Отаным үшін тер төгіп жүргенімді ойласам, жаным жадырап сала береді. Шаршағанымды ұмытып, өзімді сергек сезінемін.
– Осы әскери салада қызмет етіп келе жатқаныңызға 5 жыл толыпты. Осы уақыт аралығында сіз қызмет ететін бөлімде қандай өзгерістер болды?
− Иә, қызметке алғаш келген жылмен қазіргі кезді салыстырсам, арасы жер мен көктей екен. Мен сізге айтайын, қазіргі таңда Қазақстанның Қарулы Күштері зор қарқынмен дамуда. Жылдан-жылға емес, айдан-айға өркендеп келеді десе болады. Мемлекет басшысы Қарулы Күштерге зор көңіл бөлуде.
Біздің салада басқару жүйесі нақты жолға қойылған. Әскери бөлімдер су жаңа құрал-жабдықтармен, заманауи қару-жарақтармен жабдықталып жатыр. Сарбаздарға да зор жағдай жасалған. Олар әлеуметтік мәселелерді ойлап бастары қатпайды. Біздің ең басты мақсатымыз – ел қауіпсіздігін қамтамасыз ету. Осыған орай, біздің бөлім күндіз-түні көз ілмей Қазақ елінің көк аспанын жіті бақылап отырады. Себебі, біздің жұмыста бір сәт босаңсуға болмайды. Мұны өте жақсы түсінеміз.
– Кейде «Ана жақта соғыс өрті тұтаныпты. Мына жақта лаңкестік орын алыпты» деген хабарлар естіліп қалып жатады... – Мұндай жайсыз хабарларды естігенде жүрегіміз ауырады. Соғыс болған елде тұрақтылық жойылады. Бұл экономиканың күйреуіне әкеліп соғады. Егер дереу келіссөздер жасалмаса, соғыс өрті өршіп, салдарынан қаншама бейбіт тұрғын жазықсыздан жазықсыз оққа ұшып, жүздеген, мыңдаған сарбаз шейіт болып жатады. Соғыс деген үлкен трагедия.
Құдайға шүкір, Елбасының салиқалы саясатының арқасында біздің елімізде бейбітшілік туы желбіреп тұр. Ел аман, жұрт тыныш. Біле-білген адамға бұдан артық бақыт жоқ. Тек Қазақстанда емес, бүкіл әлемде соғыс болмасын деп тілеймін!
Әңгімелескен
Ғалымжан ЕЛШІБАЙ,
«Егемен Қазақстан»
Суретте: Нұрлыбек ӘБУОВ