Биыл оныншы жыл қатарынан өткізіліп отырған байқауға қаламыздағы 8 оқу орнынан 10 бойжеткен қатысты. Сайыс бес кезеңнен тұрды. Үш сағатқа созылған сынақта қыздар театрландырылған көріністер көрсетіп, ән айтып, би де биледі. Байқау барысында арулардың қазақ қызына тән нәзіктік, инабаттылық мінездерімен қатар, Алаш ордасының 100 жылдық мерейтойын халық арасында насихаттау үшін қыздардың тарихты, әдебиетті қаншалықты білетіндігі де сынға алынды.
Сайыс қорытындысы бойынша, бас жүлдені Құқық және бизнес колледжінен Самал Басықараева жеңіп алды. Бірінші орынға Семей қаржы экономика колледжінен Шахризада Серікова, екінші орынға Семей медицина университетінен Ботагөз Қылышбекова, үшінші орынға Шәкәрім университетінен Әсем Асхатовалар шықты. Барлық жеңімпаздар мен жүлдегерлер бағалы сыйлықтармен және дипломдармен марапатталды.
Раушан НҰҒМАНБЕКОВА
Семей
